ޚިދުމަތް ދޭ ފަރާތަކުން އެންގިނަމަވެސް، މަގުތަކަށް ކުނި ކޮތަޅުތައް ނެރެފައި ނުބެހެއްޓުމަށް އެންވަޔަރަމަންޓަލް ޕްރޮޓެކްޝަން އެޖެންސީ، އީޕީއޭއިން އަންގައިފިއެވެ.
އީޕީއޭ އިން ނެރުނު އިއުލާނެއްގައި ވަނީ މިހާރަކަށް އައިސް މާލެ، ހުޅުމާލެ އަދި ވިލިމާލޭގެ މަގުތަކަށާއި ގޭގެ ދޮރުމައްޗަށާއި ކަންކަންމައްޗަށް ކުނި ނެރެފައި ބެހެއްޓުން އިތުރުވެފައިވާކަން ފާހަގަކޮށްފައެވެ. މާލެ ސަރަހައްދުގެ މަގުތަކަކީ ކާރުބާރު ބޮޑު އަދި ހަނި މަގުތަކަކަށްވުމުން މަގުތަކަށް ކުނި ނެރެފައި ބެހެއްޓުމުން ތަފާތު އެކި އުނދަގޫތަކާ ކުރިމަތިވާ ކަމަށާއި މަގުތަކުގެ ސާފުތާހިރުކަން ގެއްލި މަގުތައް ހަރާބުވެ ގޮނޑުވަމުންދާ ކަމަށް އީޕީއޭ އިން ވަނީ ބުނެފައެވެ.
އީޕީއޭއިން ބުނީ ކުނި އުކާލުމުގެ ހިދުމަތް ދޭ ފަރާތްތަކުން އަންގައިގެން ކަމަށްބުނެ މަގުތަކަށް ކުނި ނެރޭކަން ފާހަގަކުރެވޭ ކަމަށެވެ. އެގޮތަށް ކުނި ނެރެން އެންގިނަމަވެސް މަގުމަތީގައި ކުނި ކޮތަޅުތައް ބަހައްޓައިގެން ނުވާނެ ކަމަށް އެ އެޖެންސީން ވަނީ ބުނެފައެވެ.
އީޕީއޭ އިން ބުނީ ކުނި ނެގުމުގެ ހިދުމަތްދޭ ފަރާތުން އައިސް ނަގައިގެން ގެންދާނެ ކަމަށް ބަލައި ގޭދޮރުން ބޭރުގައި ކުނި ބަހައްޓާކަން ފާހަގަކުރެވޭ ކަމަށެވެ. ކުނި އުކާލުމުގެ ހިދުމަތްދޭ ފަރާތުގެ މުވައްޒަފުން ގެއަށް ނުވައްދަންވެގެން ނުވަތަ އާންމުކޮށް އަންނަ ގަޑިއަށް ނައުމުން ކުނި ކޮތަޅު މަގުމަތީގައި ބަހައްޓާ ކަމަށް އީޕީއޭއިން ވަނީ ބުނެފައެވެ.
އޭގެ އިތުރުން އެކި މަސައްކަތްކުުރާ ތަންތަނުން ޕިކަޕެއް ފުރެންދެން މަގުމަތީގައި ކުނި ބަހައްޓާ ކަމަށާއި ފަރުނީޗަރު ފަދަ ތަކެތި އުކާލުމުގެ އަގު ބޮޑުކަމަށް ބުނެ މަގުމައްޗަށް ނެރެފައި ބަހައްޓާކަން ފާހަގަކުރެވޭ ކަމަށެވެ. އެކަންކަމަކީ ކުނި މެނޭޖުކުރުމުގެ ގާނޫނާއި ކުނި މެނޭޖުކުރުމުގެ ގަވާއިދާ ހިލާފުކަމެއްކަމަށްވާތީ އެފަދަ އަމަލުތައް ނުކުރުމަށް އީޕީއޭ އިން ވަނީ ނަސޭހަތްތެރިވެފައެވެ.
އީޕީއޭގެ ވާހަކަތަކާއި ގުޅިގެން ވެމްކޯއިން ބުނީ ކުނި ނެރެ މަގުމަތީގައި ބެހެއްޓުމަށް ކަސްޓަމަރުންނަަށް އަންގާފައި ނުވާނެކަމަށެވެ. އަދި ވެމްކޯގެ މުވައްޒަފުން ކުނި ނަގަމުންދާނީ ގޭގެއަށް ވަދެގެންކަމަށާއި ބައެއް ކަސްޓަމަރުން މިގޮތަށް ކުނި ނެރެ މަގުމަތީގައި ބަހައްޓަމުންދާތީ، އެކަން އެގޮތަށް ނުކުރުމަށް އަންގާކަމަށްވެސް ވެމްކޯއިން ބުނެއެވެ.
