އަންގާރަ ދުވަހުގެ ރޭ އިސްރާއީލުގެ ސިފައިން މާތްވެގެންވާ އަލްއަގްސާ މިސްކިތަށް ވަދެ، އެތަނުގައި އަޅުކަންކުރަންތިބި ފަލަސްތީނުގެ މީހުންނަށް ދިން ހަމަލާއާއި، މި މާތް ރަމަޟާން މަހު އަޅުކަންކުރާ މީހުންނަށް އަނިޔާކޮށް މިސްކިތުގެ ޙުރުމަތް ކެނޑި މައްސަލަ، ދިވެހި ސަރުކާރުން ވަރަށްބޮޑަށް ކުށްވެރިކޮށްފިއެވެ.
މިކަމާ ގުޅިގެން ދިވެހި ސަރުކާރުން ނެރުނު ނޫސްބަޔާނުގައި ވަނީ އިސްރާއީލު ސިފައިންގެ މި ޢަމަލުތަކަކީ ބައިނަލްއަގްވާމީ ގާނޫނުތަކާ ޚިލާފު އަމަލުތަކެއްކަމަށެވެ. އަދި އދ.ގެ ސަލާމަތީ މަޖިލީހާއި އދ.އިން އިސްރާއީލު ފަލަސްޠީނު މައްސަލައަށް ހައްލެއް ހޯދުމަށް ކުރާ މަސައްކަތަށް ހުރަސްއެޅު އެސަރަހައްދުގައި ސުލްހައާއި ހަމަޖެހުން ހޯދުމަށް ކުރާ މަސައްކަތަށް ބުރޫއަރާނެކަމެއްކަމަށެވެ.
ދިވެހި ސަރުކާރާއި ދިވެހި ރައްޔިތުން ފަލަސްތީނުގެ ރައްޔިތުންނާއެކު ތިބިކަމާއި، ފަލަސްޠީނުގެ މިނިވަން ދައުލަތެއް ޤާއިމުކުރުމަށާއި އަދި ފަލަސްޠީނުގެ ރައްޔިތުންގެ ހައްޤުތައް ޤާއިމުކުރުމަށް ވަކާލާތުކުރުންމަތީ ދިވެހި ރާއްޖެ ދެމިއޮންނާނެކަމަށް ދިވެހި ސަރުކާރުގެ ބަޔާނުގައިވެއެވެ.
މިމައްސަލައަށް ސުލްހަވެރި ހައްލެއް ހޯދޭނީ ދެ ދައުލަތުގެ ހައްލެއްގެ ތެރެއިންކަމަށާ، 1967ގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސަކީ ފަލަސްޠީނުގެ ވެރިރަށް ކަމުގައި ކަނޑައަޅައި މިނިވަން އަދި މުސްތަޤިއްލު ދައުލަތެއް ފަލަސްތީނުގައި ޤާއިމުކުރުމަށް ދިވެހި ރާއްޖެއިން ކުރަމުން އަންނަ ވަކާލާތު މި ބަޔާނުގައިވެސް ތަކުރާރުކޮށްފައިވެއެވެ.
