މިއަހަރުގެ ފާއިތުވެދިޔަ ދެ މަސްދުވަހުގެ ތެރޭގައި 350000އަށްވުރެ ގިނަ ފަތުރުވެރިން ރާއްޖެއަށް އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
އެމިނިސްޓްރީން ހާމަކުރައްވާފައިވާގޮތުގައި މިއަހަރުގެ ފުރަތަމަ ދެމަސް ދުވަހުގެތެރޭގައި 350413 ފަތުރުވެރިން ވަނީ ރާއްޖެއަށް އައިސްފައެވެ. މިއީ މިދިޔަ އަހަރުގެ މުމުއްދަތާ އަޅާބަލާއިރު, %25 ކުރިއެރުމެކެވެ. މިދިޔަ އަހަރުގެ ފުރަތަމަ ދެ މަސް ދުވަހު ރާއްޖެއަށް އައިސްފައިވަނީ 280,776 ފަތުރުވެރިންނެވެ. 2021ވަނަ އަަހަރުގެ މިމުއްދަތުގައި އައިސްފައިވަނީ 188,985 ފަތުރުވެރިންނެވެ.
މި އަހަރުގެ މިހާތަނަށް ރާއްޖެއަށް އެންމެގިނަ ފަތުރުވެރިން އަންނަ ޤައުމަކަށް ވެފައި ވަނީ ރަޝިއާއެވެ. ރަޝިއާއިން ރާއްޖެއަށް 44,748 ފަތުރުވެރިން މިދިޔަ ދެމަސްދުވަހު އައިސްފައިވެއެވެ. ކޯވިޑާއެކު ބަންދުކުރި ޗައިނާ އަލުން ހުޅުވައި މިހާރު ރާއްޖެއަށްވެސް ދަތުރުތައް ފަށުމާއެކު ޗައިނާ ފަތުރުވެރިން އަންނަ މިންވަރުވެސް އައިންނަނީ އިތުރުވަމުންނެވެ. ޗައިނާއަކީ ކޯވިޑްގެ ކުރިން ރާއްޖެއަށް އެންމެ ގިނަ ފަތުރުވެރިން އަންނަމުންދިޔަ ޤައުމެވެ.
ރާއްޖޭގައި މިވަގުތު ފަތުރުވެރިކަމުގެ ބެޑް ކެޕޭސިޓީއަށް ބަލާއިރު، 60,138 އެނދު އެބަހުއްޓެވެ. އެއީ 168 ރިސޯޓުގެ 41،049 އެނދާއި، 13 ހޮޓެލެއްގެ 1640 އެނދާއި، 886 ގެސްޓްހައުސްއެއްގެ 14,310 އެނދު އަދި 154 ސަފާރީއެއްގެ 3139 އެނދެވެ.
