އެޕްޑީޕީގެ ރިޔާސީ ކެނޑިޑޭޓަށް ކުރިޔަށް އޮތް ރިޔާސީ އިންތިޚާބު ކާމިޔާބުކޮށް ދިނުމަށް އެންމެ ބުރަކޮށް މަސައްކަތް ކުރައްވަން ޖެހޭ ފަރާތަކީ، އެޕާޓީގެ ރައީސްގެ ހައިސިއްޔަތުން ރައީސް ނަޝީދު ކަމުގައި، ރައްޔިތުންގެ މަޖިލިހުގެ ހުޅުމާލޭ ދާއިރާގެ މެމްބަރު އަލީ ނިޒާޒު ވިދާޅުވެއްޖެއެވެ.
ރޭ ވީޓީވީއިން ގެނެސްދިން ފަސްމަންޒަރު ޕްރޮގްރާމްގައި ވާހަކަ ދައްކަވަމުން އަލީ ނިޔާޒު ވިދާޅުވީ އެމްޑީޕީގެ ރިޔާސީ ޓިކެޓް ހަވާލުކުރުމުގެ ރަސްމިއްޔާތަށް ޕާޓީގެ ރައީސްގެ ހައިސިއްޔަތުން ނަޝީދު ވަޑައިނުގަތުމަކީ ވަރަށް ދެރަކަމެއް ކަމަށާއި، އެމްޑީޕީގެ ރައީސްގެ މަސްއޫލިއްޔަތެއްވެސް އޮންނަ ކަމުގައެވެ.
މިގޮތުން، ރިޔާސީ ޓިކެޓް ލިބިވަޑައިގަންނަވާ ފަރާތާއެކީ މަސައްކަތްކޮށް، އިންތިޚާބު ކާމިޔާބު ކުރުމަށް މަސައްކަތް ކުރުމަމީ އެޕާޓީގެ ރައީސްގެ މަސްއޫލިއްޔަތެއް ކަމުގައިވެސް ނިޒާރު ވިދާޅުވިއެވެ. އަދި ޕާޓީގެ ރިޔާސީ ޓިކެޓް ހަވާލު ކުރި ޖަލްސާއަށް ނަޝީދު ވަޑައިނުގަތުމަކީ ކުރައްވައިގެން ވާނެކަމެއް ނޫން ކަމަށާއި، އަދިވެސް އެދެނީ ބަލިވީމަ ބަލި ގަބޫލުކޮށް، ނާކާމިޔާބީގަ ހިތްތިރިކޮށް، ވިސްނަވާ ވަޑައިގެން، ނަޝީދު އަލުން އެބުރި ވަޑައިގަތުމަށްވެސް ނިޔާޒު ވިދާޅުވިއެވެ.
ވަރަށް ދެރަކަމެއް އެ ކުރެއްވީ. ޕާޓީގެ ރައީސާއި ރިޔާސީ ޓިކެޓް ހަވާލުކުރުމުގެ ރަސްމިއްޔާތަށް ވަޑައިގަންނަވަން ވާނެ. ޕާޓީގެ ރައީސްގެވެސް މަސްއޫލިއްޔަތެއް އޮވޭ. ޕާޓީގެ ރައީސްގެ މަސްއޫލިއްޔަތުގެ ތެރޭގައި، ރިޔާސީ ޓިކެޓް ލިބިވަޑައިގަންނަވާ ފަރާތާއެކީ މަސައްކަތް ކޮށް، އިންތިޚާބު ކާމިޔާބު ކުރުމަށް މަސައްކަތް ކުރަންޖެހޭ.
ވީޓީވީގައި ވާހަކަ ދައްކަވަމުން އަލީ ނިޔާޒު ވިދާޅުވިއެވެ.
އޭނާ އިތުރަށް ވިދާޅުވީ މިވަގުތުވެސް ނަޝީދަކީ ޕާޓީގެ ރައީސް ކަމަށާއި، އެމްޑީޕީއަށް އިންތިޚާބު ކާމިޔާބު ކޮށްދިނުމަށް އެންމެ ބުރަކޮށް މަސައްކަތް ކުރައްވަންޖެހޭ ފަރާތަކީ ޕާޓީގެ ރައީސް ކަމުގައެވެ.
ޕާޓީގެ ރައީސް ރައީސް ނަޝީދަކީ. އެހެންވީމަ ޕާޓީގެ ރިޔާސީ ކެނޑިޑޭޓު ހޮވުމަށްޓަކާ އެންމެ ބުރަކޮށް މަސައްކަތް ކުރައްވަންޖެހޭ އެއްފަރާތަކީ ޕާޓީގެ ރައީސް. އެހެންވީމަ ޕާޓީގެ ރައީސް އެކަން ނުކުރައްވާ ހުންނަވާނެ ކަމަކަށް އަޅުގަޑު ގަބޫލެއް ނުކުރަން. މިވަގުތު އަދި ޚިޔާލުތަފާތުވުން ހުރެގެން އެއްފަރާތްވެގެން ހުންނެވި ނަމަވެސް، އަޅުގަޑު ދެކޭ ގޮތުގައި ކެންޕޭން ފެށީމަ ކެމްޕޭނާ އެއްކޮށް ހަމަ ރަށްރަށަށްވެސް ދަތުރު ކުރައްވަންވާނެ. އަދި މި ސިޔާސަތުތައް ވިއްކުމަށްޓަކާ ކުރެވެންހުރި ހުރިހާ މަސައްކަތެއް ޕާޓީގެ ރައީސް ކުރައްވަން ޖެހޭކަމަށް އަޅުގަޑު ގަބޫލުކުރަނީ.
އަލީ ނިޔާޒު ވިދާޅުވިއެވެ.
ރައީސް ސާލިހަށް ރިޔާސީ އިންތިޚާބު ކުރުމަށް، ޕާޓީގެ ރައީސްގެ ހައިސިއްޔަތުން ނަޝީދު މަސައްކަތް ކުރައްވަންޖެހޭކަމަށް އަލީ ނިޔާޒު ވިދާޅުވި ނަމަވެސް، ފާއިތުވެދިޔަ ރިޔާސީ ޕްރައިމަރީގައި ނަޝީދު ވިދާޅުވެފައިވަނީ، ރައީސް ސާލިހަށް ރިޔާސީ ޓިކެޓް ލިބިވަޑައިގެންފިނަމަ، ހުންނަވާނީ ގޭގަކަމަށެވެ. އަދި ނަޝީދަށް ތާއީދުކުރާ ފަރާތްތަކުން ބުނަމުންދަނީ ރައީސް ސާލިހަށް ރިޔާސީ އިންތިޚާބު ކާމިޔާބު ކޮށްދިނުމަށް އެހީތެރިކަން ފޯރުކޮށް ނުދޭނެކަމުގައެވެ.
މިހަފްތާގެ ހުކުރު ދުވަހުގެރޭ އެމްޑީޕީންވަނީ ރަސްމީކޮށް ރައީސް ސާލިހާއި އެޕާޓީގެ ރިޔާސީ ޓިކެޓް ހަވާލު ކޮށްފައެވެ. އެޖަލްސާއަށް ނަޝީދުގެ އިތުރުން ތާއީދުކުރާ ފަރާތްތަކުންވެސް ހާޒިރުވެފައެއް ނުވެއެވެ.
