ކުޑަކުއްޖަކަށް ޖިންސީ ގޯނާކުރުމުގެ ދައުވާލިބުނު އިންޑިއާ މީހެއްގެ މައްސަލަ ހައި ކޯޓުގައި އިސްތިއުނާފް ކޮށްފައި ވަނިކޮށް އޭނާ ޑީޕޯޓްކޮށްލީ އޭނާގެ މައްސަލަ ކޯޓުގައި އޮތްކަން ޕްރޮސެކިއުޓާ ޖެނެރަލްގެ އޮފީހުން އަންގާފައި ނުވާތީ ކަމަށް އިމިގްރޭޝަނުން ބުނެފިއެވެ.

އެ އިދާރާއިން މިހެން ވިދާޅުވީ، ޖިންސީ ނިޔަތެއްގައި ކުޑަކުއްޖެއްގެ ގައިގައި އަތްލުމުގެ ދަޢުވާ ލިބުނު އިންޑިއާ މީހެއްގެ މައްސަލަ ހައި ކޯޓުގައި އިސްތިއުނާފުކޮށް އެ މައްސަލަ ފެށިއިރު، ދައުވާ ލިބޭ މީހާ ޑިޕޯޓް ކޮށްލާފައިވާކަމަށް ބުނާ މައްސަލައާއި ގުޅިގެންނެވެ.

ޖިންސީ ނިޔަތެއް އޮވެގެން ކުޑަކުއްޖެއްގެ ގައިގައި އަތްލި ކަމަށް ބުނެ އިންޑިއާ މީހެއްގެ މައްޗަށް ކުރި ދައުވާ ސާބިތުނުވާ ކަމަށް ކްރިމިނަލް ކޯޓުން ނިންމުމުން އެ މައްސަލަ ދައުލަތުން ހައި ކޯޓުގައި އިސްތިއުނާފް ކޮށްފައި ވަނިކޮށް މިދިޔަ ޑިސެމްބަރު މަހު އިމިގްރޭޝަނުން އޭނާ ޑީޕޯޓްކޮށްލައިފައެވެ. އެހެންވެ، ހައި ކޯޓުން ވެސް މިހާރު ވަނީ އެ މައްސަލަ ބޭރުކޮށްލައިފައެވެ.

މިކަމާއި ގުޅިގެން މޯލްޑިވްސް އިމިގްރޭޝަނުން ނެރުނު ބަޔާނެއްގައި ވަނީ، އިންޑިއާގެ ރައްޔިތެއްކަމުގައިވާ ރަމޭޝް ސެލްވަމޮނީ އަކީ ދިވެހިރާއްޖޭގެ އިމިގްރޭޝަންގެ ޤާނޫނާއި ޚިލާފްވުމުގެ ސަބަބުން ރާއްޖެއިން ފުރުވާލެވެންދެން އިމިގްރޭޝަންގެ ޑިޓެންޝަން ސެންޓަރުގައި 2022 ސެޕްޓެމްބަރ 25 އިން ފެށިގެން ބަހައްޓާފައިވާ މީހެއްކަމަށެވެ. އަދި އޭނާ މިދިޔަ ޑިސެމްބަރު 8 ވަނަ ދުވަހު ދިވެހިރާއްޖެއިން ޑީޕޯޓްކޮށްލުމާއި ހަމައަށްވެސް އޭނާއާ ގުޅޭ ޖިނާޢީ އެއްވެސް މައްސަލައެއް ދިވެހިރާއްޖޭގެ ކޯޓެއްގައި އިސްތިއުނާފު ކޮށްފައިވާކަން ޕްރޮސެކިއުޓަރ ޖެނެރަލް އޮފީހުން ރަސްމީ ސިފައެއްގައި އެ އިދާރާއަށް އަންގާފައިނުވާކަމަށެވެ.

ރަމޭޝް ރާއްޖެއިން ފުރުން މަނާކޮށް އެއްވެސް ކޯޓު ޢަމުރެއް އެ އިދާރާއަށް ލިބިފައި ނުވާކަމަށްވެސް އިމިގްރޭޝަނުން ވިދާޅުވިއެވެ.