މިހާރު ރައްޔިތުންގެ މަޖިލީހަކީ ސިޔާސީ ހަސަދަ ފިލުވާތަނަކަށް ބަޔަކު ހަދައިފިކަމަށް ވިދާޅުވެ ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ކަންބޮޑުވުން ފާޅުކުރައްވައިފިއެވެ.
އޭނާ އިޝާރާތްކުރައްވަނީ އިދިކޮޅު މެމްބަރުންނަށްކަމެއް ނުވަތަ މަޖިލީހުގެ ރާއީސް ނަޝީދުގެ ފެކްޝަނުގެ އެމްޑީޕީ މެމްބަރުންނަށްކަމެއް ސާފެއް ނުވެއެވެ. އެހެންނަމަ މި ދެބައި މީހުންނަށްވެސް މަވޯޓާ ފާޑު ވިދާޅުވެއެވެ. އަދި މަޖިލީހުގެ ތަޅުމުގައި މި ދެބައިމީހުން ޢަމަލުކުރަނީވެސް އިޚްލާސްތެރިކަމެއް ނެތި އަމިއްލަ ވަކި މަޤުސަދެއް ޙާސިލްކުރުމަށްކަމަށް މަވޯޓާ ތުހުމަތުކުރައްވައެވެ.
އޭނާ މިއަދު ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހަކީ ރައްޔިތުންގެ ގެ ކަމަށެވެ. އަދި އެމަޖިލީހުގެ ތަޅުން ބޭނުންކުރަން ވާނީ ރައްޔިތުންގެ ލާބަޔާއި މަންފާއަށް ކަމަށެވެ. މީގެ އިތުރުން ޤައުމުގެ ސަލާމަތްތެރިކަން ދެމެހެއްޓުމަށާއި މުޅި ދައުލަތުގެ އެންމެ މަތީ މަސްލަޙަތު ޙިމާޔަތްކުރުމަށް ކަމަށެވެ. އެހެންނަމަވެސް ރައްޔިތުންގެ މަޖިލީހަކީ ސިޔާސީ ޙަސަދަ ފިލުވާތަނަކަށް ހަދާފައިވާކަމަށް މަވޯޓާ ވިދާޅުވިއެވެ.
Majlisakee rayyithunge ge.E Majlisge thalhun beynun kureven vaanee rayyithun ge laabayaa manfaa ah. Gaumuge salaamaiy therikan dhemehettumah.Mulhi dhaulathuge emme mathee masalahathu himaayai kurumah. Namaves riyasathun Majlis akee siyaasee hasadha filuvaa thanakah hahdhavaifi
— Ibrahim Shareef (@AdduShareef) February 9, 2023
ރައްޔިތުންގެ މަޖިލިސް ވަގުތުން ދުރައް ދައްކަން ފެށިފަހުން އެމަޖިލީހުގެ ތަޅުމުގަޔާއި އެހެން މަސައްކަތްތަކުގައި މެމްބަރުން އެއްބަޔަކު އަނެއްބަޔަކަށް ޒާތީ ވާހަކަދެއްކުމާއި ހޫނު ޒުވާބުކުރުމާއި ސިޔާސީ ޙަސަދަ ފިލުވުމުގެ ކަންކަން އަންނަނީ ފެންނަމުންނެވެ. ޚާއްސަކޮށް މަލްޓި ޕާޓީ ނިޒާމަކަށް ވެރިކަމުގެ ނިޒާމު ބަދަލުކުރި މަރުޙަލާއާއި އޭގެ ފަހުން ހިނގައިދިޔަ އެކި ދުވަސްތަކުގައި މިކަން ބޮޑެވެ.
