ފަނޑިޔާރުން ކޮންޓްރޯލުކޮށް އެންމެ ބޮޑަށް ފަނޑިޔާރުންނަށް ނުފޫޒު ފޯރުވަނީ ޖުޑީޝަލް ސަރވިސް ކޮމިޝަން (ޖޭއެސްސީ)އިން ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު ޢަލީ ޙުސައިން ވިދާޅުވެއްޖެއެވެ.
އަލީޙުސައިން މިހެން ވިދާޅުވީ، ސުޕްރީމް ކޯޓުގެ ފަނޑިޔާރު އަލްއުސްތާޒު މަހާޒް ޢަލީ ޒާހިރުގެ މައްޗަށް ޖޭއެސްސީން ތުހުމަތުކުރާ، ފަރިއްކޮޅުގެ މައްސަލައަށް އިޝާރާތްކުރައްވައި ކުރެއްވި ޓްވީޓެއްގައެވެ. އަބަދުވެސް ޖުޑިޝަރީއަށް ސިޔާސީ ނުފޫޒު ފޯރުވާކަމަށް ކުރެވޭ ތުހުމަތުތަކާ ގުޅިގެން ނޫހަކުން ލިޔެފައިވާ އާޓިކަލެއް ޝެއަރކުރައްވައި ޢަލީ ޙުސައިންވަނީ ފަނޑިޔާރުންނަށް އެންމެ ބޮޑަށް ނުފޫޒު ފޯރުވަނީ ޖޭއެސްސީންކަމަށް ތުހުމަތުކުރައްވާފައެވެ.
ފަނޑިޔާރުން ކޮންޓްރޯލުކޮށް އެންމެ ބޮޑަށް ނުފޫޒު ފޯރުވަނީ ޖޭއެސްއީ އިން. https://t.co/H7NYRzTMrs
— Ali Hussain (@AleeVoice) December 7, 2022
ޖޭއެސްސީ އެކުލެވިގެންވާގޮތަށް ބަލާއިރު، ސަރުކާރު ހިންގާ ބާރު ނުވަރަ ރައީސުލްޖުމްހޫރިއްޔާގެ ޕާޓީއަށް ރައްޔިތުންގެ މަޖިލީހުގެ މެޖޯރިޓީ ލިބިއްޖެނަމަ، ޖޭއެސްސީގެ ފުރިހަމަ ކޮންޓްރޯލް އޮންނާނީ ސަރުކާރަށެވެ. އެއާއެކު ދައުލަތުގެ ތިން ބާރުގެ ކޮންޓްރޯލް ސަރުކާރަށް ނުވަތަ ރައީސުލްޖުމްހޫރިއްޔާއަށް ލިބެއެވެ.
މިހާރު ޖޭއެސްސީ އެކުލެވިގެންވާގޮތަށް ބަލާއިރު، ޖޭއެސްސީގައި މެންބަރުންގެ ގޮތުގައި ހިމެނެނީ ރައްޔިތުންގެ މަޖިލީހުގެ ރައީސާއި ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން އެ ކޯޓުން އިންތިހާބު ކުރާ އުއްތަމަ ފަނޑިޔާރު ފިޔަވައި އެހެން ފަނޑިޔާރަކާއި ހައިކޯޓުގައި ހިމެނޭ ފަނޑިޔާރުންގެ ތެރެއިން އެ ކޯޓުން އިންތިހާބު ކުރާ ފަނޑިޔާރަކާއި، ދަށު ކޯޓުތަކުގެ ފަނޑިޔާރުންގެ ތެރެއިން އެ ކޯޓު ތަކުން އިންތިހާބު ކުރާ ފަނޑިޔާރަކާއި، ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން ކަނޑައަޅާ މެންބަރަކާއި އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހަކާއި ރައީސުލްޖުމްހޫރިއްޔާ އައްޔަންކުރާ މީހަކާއި ބަންޑާރަނައިބާއި ދިވެހިރާއްޖޭގައި ގާނޫނީ ވަކީލުކަން ކުރުމުގެ ހުއްދަ ލިބިފައިވާ ވަކީލުންގެ ތެރެއިން އެބައިމީހުން އިންތިހާބު ކުރާ ގާނޫނީ ވަކީލަކެވެ. ޖުމުލަ 9 މެމްބަރުންނެވެ.
ސަރުކާރަށް ރައްޔިތުންގެ މަޖިލީހުގެ މެޖޯރީޓީ ލިބިފައި އޮންނައިރު 10 މެމްބަރުންގެތެރެއިން 6 މެމްބަރުން ތިބޭނީ ސަރުކާރުން ބޭނުންވާ ގޮތަކަށެވެ. ސަރުކާރުގެ ސީދާ ދައުރެއް ނެތި ތިބޑޭނީ 4 މެމްބަރެކެވެ. ސަރުކާރުގެ ނުފޫޒެއް ނެތި އައްޔަން ކުރާ 4 މެމްބަރުންނަކީ، ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން އެ ކޯޓުން އިންތިހާބު ކުރާ އުއްތަމަ ފަނޑިޔާރު ފިޔަވައި އެހެން ފަނޑިޔާރަކާއި، ހައިކޯޓުގައި ހިމެނޭ ފަނޑިޔާރުންގެ ތެރެއިން އެ ކޯޓުން އިންތިހާބު ކުރާ ފަނޑިޔާރަކާއި، ދަށު ކޯޓުތަކުގެ ފަނޑިޔާރުންގެ ތެރެއިން އެ ކޯޓު ތަކުން އިންތިހާބު ކުރާ ފަނޑިޔާރަކާއި، ދިވެހިރާއްޖޭގައި ގާނޫނީ ވަކީލުކަން ކުރުމުގެ ހުއްދަ ލިބިފައިވާ ވަކީލުންގެ ތެރެއިން އެބައިމީހުން އިންތިހާބު ކުރާ ގާނޫނީ ވަކީލަކެވެ. މިމީހުން ޢައްޔަންކުރުމުގައިވެސް ރައްޔިތުންގެ މަޖިލީހުގެ ސާފު އަޣުލަބިއްޔަތު ސަރުކާރަށް އޮވެއްޖެނަމަ ސަރުކާރުގެ ނުސީދާ ނުފޫޒު އޮވެއެވެ.
ސީދާ ސަރުކާރުގެ ނޫފޫޒާއި ބާރުގައި ޖޭއެސްސީއަށް ޢައްޔަންކޮށްފައިވާ މެމްބަރުންނަކީ ރައްޔިތުންގެ މަޖިލީހުގެ ރައީސާއި ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން ކަނޑައަޅާ މެންބަރާއި އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހާއާއި ރައީސުލްޖުމްހޫރިއްޔާ އައްޔަންކުރާ މީހާއާއި ސިވިލް ސަރވިސް ކޮމިޝަނުގެ ރައީސާއި ބަންޑާރަނައިބެވެ.
ޖޭއެސްސީގައި ރައްޔިތުންގެ މަޖިލީހުގެ ރައީސްގެ ޙައިސިއްޔަތުން މިހާރު އިންނަވަނީ ވެރިކަންކުރާ މައިޕާޓީ އެމްޑީޕީގެ ރައީސް މުޙައްމަދު ނަޝީދެވެ. ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން ކަނޑައަޅާ މެންބަރެއްގެގޮތުގައި އިންނަވަނީ ތުޅާދޫ ދާއިރާގެ އެމްޑީޕީ މެމްބަރު އަލްއުސްތާޛާ ޙިސާން ޙުސައިނެވެ. އެކަމަނާއަކީ ޖޭއެސްސީގެ ރައީސްވެސް މެއެވެ. އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހެއްގެގޮތުގައި އިންނަވަނީ އާމިނަތު އުއްމުކުލްޘޫމެވެ. އެއީ އެމްޑީޕީގެ ސަރުކާރުން ބޭނުންވެގެން އައްޔަންކުރި މީހެކެވެ. ރައީސުލްޖުމްހޫރިއްޔާ އައްޔަންކުރާ މީހަކަށް އިންނެވީ އަލްއުސްތާޛު މަސްތޫރު ޙުސްނީއެވެ. އެއީ ކޮމިޝަނުގެ ނައިބު ރައީސެވެ. ދެން ހިމެނެނީ ބަންޑާރަ ނައިބު އަލްއުސްތާޛު އިބްރާހީމް ރިފްޢަތެވެ. އޭނާއަކީ ކެބިނެޓު މެމްބަރެކެވެ. މީގެ އިތުރުން ސިވިލް ސަރވިސް ކޮމިޝަނުގެ ރައީސަކު އައްޔަންކުރަނީ މަޖިލީހުންނެވެ. އެހެންވީމާ އޭނާވެސް ވާނީ މަޖިލީހުގެ އަޣުލަބިއްޔަތު ރުހޭ މީހަކަށެވެ.
ސަރުކާރުން ބޭނުންވާގޮތަށް ޖޭއެސްސީން ފަނޑިޔާރުންނަށް ނުފޫޒު ފޯރުވާކަމަށް ތުހުމަތުކުރަނީ މިއުސޫލުން ޖޭއެސްސީ އޮންނާތީއެވެ. ރައްޔިތުންގެ މަޖިލީހުގެ ނިމިދިޔަ ދައުރު ނިމުމުގެ ކުރިން، ޖޭއެސްސީ އެކުލެވިގެންވާގޮތް ބަދަލުކުރަން ޤާނޫނަށް އިސްލާޙު ހުށަހަޅުއްވާނެކަމަށް ސަރުކާރުން ކުރިން ވިދާޅުވިއެވެ. އެހެންނަމަވެސް ދައުރު ނިމި މަޖިލިސް ޗުއްޓީއަށް ދިޔައިރުވެސް އެކަމުގެ ޚަބަރެއް ނުވެއެވެ. އެއިސްލާޙެއް ހުށައެއް ނާޅައެވެ.
