ޖުޑީޝަލް ސަރވިސް ކޮމިޝަން (ޖޭއެސްސީ) އެކުލެވިގެންވާގޮތް މުރާޖަޢާކުރުމަށް ޤާނޫނު އަސާސީއަށް އިސްލާޙު ގެނައުމުގެ ޤާނޫނެއް އުކުލަވާލުމުގެ މަސައްކަތް ފަށްޓަވާފައިވާކަމަށާ، މަޖިލީހުގެ 3ވަނަ ދައުރުކަމަށްވާ މި ދައުރު ނިމުމުގެކުރިން އެކަމުގެ ބިލް މަޖިލީހަށް ހުށަހަޅުއްވާނެކަމަށް އެޓަރނީ ޖެނަރަލްގެ އޮފީހުން ވިދާޅުވީ މިދިޔަ ސެޕްޓެމްބަރު މަހުގެ 29ވަނަ ދުވަހުއެވެ. މިއަދު މަޖިލީހުގެ 3ވަނަ ދައުރުގެ ފަހު ޖަލްސާއާ ހަމައަށް އައިއިރު އޭޖީ އެވިދާޅުވި ބިލެއް މަޖިލީހަށް ވެއްދިކަމުގެ ހިލަމެއް ނެތެވެ.
ޖޭއެސްސީ އިސްލާޙުކުރުމުގެ މަސައްކަތުގެ ވާހަކައަކީ އަބަދުވެސް އިވޭ ވާހަކައެކެވެ. 2018ވަނަ އަހަރުގެ ރިޔާސީ އިންތިޚާބުގެ ކެމްޕެއިން ދުވަސްވަރު ރައީސް އިބްރާހީމް މުޙައްމަދު ޞާލިޙާއި އެމަނިކުފާނުގެ ކެމްޕެއިން ޓީމާއި އެމްޑީޕީން މިވާހަކަ ވަރަށްބޮޑަށް ދެއްކިއެވެ. އަދި ޖޭއެސްސީގައި ސިޔާސީ ބޭފުޅުން ތިއްބަވައިގެން ފަނޑިޔާރުގެއަށް ސިޔާސީ ނުފޫޒު ފޯރުވާކަމަށް ތިުހުމަތުކުރިއެވެ. އަދި އެކަން ބަދަލުކޮށް ޖޭއެސްސީ އެކުލެވިގެންވާގޮތް ބަދަލުކޮށް އެއީ ސިޔާސީ ނުފޫޒުން އެއްކިބާވެފައިވާ މިނިސްވަން މުސްތަޤިއްލު މުއައްސަސާއަކަށް ހަދާނެކަމަށް ވަޢުދުވިއެވެ.
ރައީސް އިބްރާހީމް މުޙައްމަދު ޞާލިޙް ރިޔާސީ އިންތިޚާބު ކާމިޔާބުކުރައްވައި ވެރިކަމުގެ ހުވާ ކުރައްވައި، އިސްލާޙީ މަސައްކަތް ފެއްޓެވިއެވެ. ފަނޑިޔާރުގެ އިސްލާޙުކުރުމުގެ ބިޔަ މަޝްރޫޢެއް ސަރުކާރުން ފެއްޓެވީ ރައްޔިތުންގެ މަޖިލީހުގެ ސުޕަރ މެޖޯރިޓީ އެމްޑީޕީއަށް ލިބުމުންނެވެ. ކޯލިޝަން ޕާޓީތަކާ ނުލައި ސީދާ އެމްޑީޕީއަށް މިވަރުގެ މެޖޯރިޓީއެއް މަޖިލީހުން ލިބުމުން ފެއްޓެވި އިސްލާޙީ މަސައްކަތުން މިހާތަނަށް އެތައް ފަނޑިޔާރުންނެއް މަޤާމުން ވަކިކޮށް އާ ފަނޑިލާރުން ލައި، އެއްކޯޓުން އަނެއް ކޯޓަށް ފަނޑިޔާރުން ބަދަލުކޮށް މިފަދަ އެތައްކަމެއް ކޮށްފިއެވެ. އެހެންނަމަވެސް ޖޭއެސްސީގެ ވަޢުދު އޮތީ އޮތްގޮތަށް އަތްވެސް ނުލައެވެ.
މިހެން މިކަން އޮއްވައި މިދިޔަ ސެޕްޓެމްބަރުމަހުގެ 29ވަނަ ދުވަހު ބަންޑާރަނައިބުގެ އޮފީހުން ވަނީ މިމަސައްކަތް އެބަ ހިނގާކަމަށާ، ޖޭއެސްސީ އެކުލެވިގެންވާގޮތް މުރާޖަޢާކޮށް ޤާނޫނު އަސާސީއަށް އިސްލާޙު ގެނައުމަށްތަކައި އެކުލަވާލަންޖެހޭ ޤާނޫނު އެކުލަވާލުވުމުގެ މަސައްކަތް މިހާރު ފަށާފައިވާކަން ހާމަކޮށް ބަޔާނެއް ނެރެފައެވެ.
އެގޮތުން ޤާނޫނުއަސާސީގެ 157ވަނަ މާއްދާގައި ބަޔާންކޮށްފައިވާ ޖުޑީޝަލް ސަރވިސް ކޮމިޝަނަކީ ދެފުށް ފެންނަ ސިޔާސީ ނުފޫޒުން މިނިވަން ވެފައިވާ މުއައްސަސާއެއްކަން ކަށަވަރުކުރުމަށްޓަކައި، ކަމާގުޅޭ ބައިނަލްއަޤުވާމީ ހަމަތަކާއި އުސޫލުތަކަށް ރިޢާޔަތްކޮށް ޤާނޫނު އަސާސީގެ 158ވަނަ މާއްދާއަށް ގެންނަންޖެހޭ އިސްލާޙުތައް އޭޖީ އޮފީހުން އެކުލަވާލާ މިބިލްގައި ހިމެނޭނެކަމަށް އެއޮފީހުގެ ބަޔާނުގައިވެއެވެ.
އަދި މިހާރު ހިނގަމުންދާ ރައްޔިތުންގެ މަޖިލީހުގެ 3ވަނަ ދައުރުގެ ތެރޭގައި މިބިލް މަޖިލީހަށް ހުށަހެޅުމަށް ނިންމަވާފައިވާކަމަށްވެސް އެއޮފީހުން ވިދާޅުވެއެވެ. މިއަދު 3ވަނަ ދައުރު މިނިމުނީއެވެ. އެބިލް ކޮބައިބާއެވެ؟ ހަމަ ގައިމުވެސް މަޖިލީހުގެ އެއްވެސް މަންސައަކުން ފެންނާކަށް ނެެތެވެ.
މިބިލް އެކުލަވާލުމަށްޓަކައި ބޭނުންވާ މަޝްވަރާކުރުމަށްޓަކައި ސުޕްރީމްކޯޓާއި، ހައިކޯޓާއި، ދަށުކޯޓުތަކުގެ އިތުރުން ޖޭއެސްސީއާއެކު މަޝްވަރާ ބައްދަލުވުންތައް ބާއްވަވާނެކަމަށްވެސް އޭޖީ އޮފީހުން ވިދާޅުވެފައިވެއެވެ. އަދި ބައެއް މުއައްސަސާތަކާއެކު މަޝްވަރާތައް ބޭއްވިވެސްމެއެވެ. އެހެންނަމަވެސް މިއިން ނުކުތް ނަތީޖާއެއް ނެތެވެ.
ޖޭއެސްސީ އެކުލެވިގެންވާގޮތް މުރާޖަޢާކޮށް، ޤާނޫނުއަސާސީއަށް އިސްލާޙު ގެނައުމަކީ، މިސަރުކާރުން ވެފައިވާ މުހިންމު ވަޢުދެކެވެ. އަދި މިވަޢުދެއް ނުފުއްދައެވެ.
