އެކެޑެމީ އޮފް މޯޝަން ޕިކްޗާ، އާޓްސް އެންޑް ސައިންސެސް (އޭއެމްޕީއޭއެސް) އިން އިންތިޒާމް ކުރާ ޝަރަފުވެރި ފިލްމު އެވޯޑް ކަމަށްވާ އޮސްކާ އެވޯޑުން މިއަހަރު އެކުލަވާލި ކޮމެޓީގެ މެމްބަރުންގެ ތެރޭގައި ބޮލީވުޑްގެ މަޝްހޫރު ބަތަލާ ކާޖޮލް ހިމެނިއްޖެއެވެ.

ކާޖޮލްގެ އިތުރުން އިންޑިއާގެ ބައެއް ތަރިން ވަނީ މެމްބަރުންގެ ތެރޭގައި ހިމެނިފައެވެ. އެގޮތުން މަޝްހޫރު ތަމަޅަ އެކްޓަރ ސޫރިއާ އާއި ޑައިރެކްޓަރ ސުޝްމިތު ގޯޝް އާއި ޑައިރެކްޓަރުން އަދި ސްކްރީން ރައިޓަރުންގެ ގޮތުގައި މަސައްކަތްކުރާ ރީމާ ކަތުގީ އާއި ރިންތޫ ތޯމަސް ހިމެނެއެވެ.

އިންޑިއާ ފަންނާނުންގެ އިތުރުން އެކެޑެމީން ފުރުޞަތު ލިބުނު ދުނިޔޭގެ މަޝްހޫރު ތަރިންގެ ތެރޭގައި "ދަ ކްއީން ގޭމްބިޓް"ގެ ތަރި އަންޔާ ޓެއިލާ، ޖޯއީ، ބިލީ އެއިލިޝް، ޖެމީ ޑޮނެން އަދި ޓްރޯއީ ކޮތުސޫރު ހިމެނެއެވެ.

އޮސްކާގެ މި އަހަރުގެ ކޮމެޓީ މެންބަރުންގެ ގޮތުގައި 397 މީހަކު ހަމަޖައްސާފައި ވެއެވެ. މީގެ ތެރެއިން 44 އިންސައްތަ މީހުންނަކީ އަންހެނުންނެވެ. އަދި މެމްބަރުންގެ ތެރެއިން 50 އިންސައްތައަކީ އެމެރިކާ އިން ބޭރު މީހުންނެވެ.

95 ވަނަ އޮސްކާ އެވޯޑު ޙަފްލާ ބާއްވަން ހަމަޖެހިފައިވަނީ އަންނަ އަހަރު މާރިޗު މަހުގެ 12 ވަނަ ދުވަހުއެވެ.