ސަރުކާރުން ކޮންމެ ދިވެއްސަކަށް ފައިދާ ބަހާގޮތަށް 10 ރިސޯޓު ހަދަން ނިންމި މަޝްރޫއަކީ ޓޫރިޒަމް ސިނާއަތަށް އަންނާނެ ބޮޑު ބަދަލެއް ކަމަށް ސިފަކުރައްވައި، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ޗެއަރމަން، ޓޫރިޒަމް ދާއިރާގެ ޕައިނިއާ އަދި ކްރައުން ކުންފުނީގެ ޗެއާޕާސަން ހުސައިން އަފީފު (ޗަމްޕާ އަފީފު)، އެ މަޝްރޫއަށް ފުރިހަމައަށް ތާއީދުކުރައްވައިފިއެވެ.

ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ޚާއްސަ ރަސްމިއްޔާތުގައި ވާހަކަ ދައްކަވަމުން އަފީފު ވިދާޅުވީ، މި މަޝްރޫއުގައި ބައިވެރިވާން ބޭނުންފުޅުވާ ކަމަށާއި، އެކަން ކާމިޔާބުވާނެ ކަމަށް އުއްމީދުކުރައްވާ ކަމަށެވެ. ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރަށެއް ރިސޯޓެއްގެ ގޮތުގައި ތަރައްޤީކޮށް، އެއިން ލިބޭ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދޭން ފަށާނެކަން ސަރުކާރުން އިއުލާންކުރީ މި އަހަރުގެ ކުރީކޮޅުއެވެ.

ޓޫރިޒަމް ދާއިރާގެ ތާރީޚަށް އަލިއަޅުއްވާލައްވަމުން އަފީފު ވިދާޅުވީ، 1970ގެ އަހަރުތަކުގައި ރާއްޖެއަށް ޓޫރިޒަމް ތައާރަފުކުރުމުގައި އެންމެ ބޮޑު ގޮންޖެހުމަކަށްވީ ރާއްޖެ އޮތް ތަނެއް ބޭރުގެ ފަރާތްތަކަށް ނޭނގުން ކަމަށެވެ. ޔޫރަޕުގެ ފެއާތަކުގައި ވޯލްޑް މެޕުގައި ރާއްޖެ ޕޮއިންޓްކޮށްދީގެން މެނުވީ ޓުއާ އޮޕަރޭޓަރުންނަށްވެސް ރާއްޖެއަކީ ސީރިއަސް މަންޒިލެއްކަން ޤަބޫލުކުރަން ދަތިވިކަން އޭނާ ފާހަގަކުރެއްވިއެވެ.

ބޭންކުތައް ނެތުމުން ޓުއާ އޮޕަރޭޓަރުންގެ އެހީތެރިކަމާއެކު ރިސޯޓުތައް ތަރައްޤީކުރި ގޮތާއި، 1996 ގައި "ހިލްޓަން" ރާއްޖެއަށް އައުމާއި، އާ އެއާލައިންތަކާއި ޚާއްސަ ފެރީގެ ޚިދުމަތާއެކު ދަތުރުފަތުރު ފަސޭހަވެގެން ދިޔުން ފަދަ ކަންކަމަކީ ޓޫރިޒަމް ދާއިރާ މުޅިން ބަދަލުކޮށްލި ކަންކަން ކަމަށް އަފީފު ވިދާޅުވިއެވެ.

1972 ގައި "ކުރުނބާ މޯލްޑިވްސް" ގެ ނަމުގައި ފުރަތަމަ ރިސޯޓު ހުޅުވިއިރު، ކޮންމެ ޓޫރިސްޓެއްގެ ބޮލަކަށް ދުވާލަކަށް ނެގީ އެންމެ 9 ޑޮލަރެވެ. އޭރު 1,097 ޓޫރިސްޓުންނާއި 280 އެނދާއެކު ފެށި މި ސިނާއަތުގައި، މިދިޔަ އަހަރު 2.2 މިލިއަން ޓޫރިސްޓުން ޒިޔާރަތްކޮށް، 67,000 އަށްވުރެ ގިނަ އެނދު މިހާރު ރާއްޖޭގައި އެބަހުއްޓެވެ. ރާއްޖޭގެ އުފެއްދުންތެރިކަން 1.3 ބިލިއަން ޑޮލަރުން މިހާރު 18 ބިލިއަން ޑޮލަރަށް އަރާފައިވާކަންވެސް އަފީފު ފާހަގަކުރެއްވިއެވެ.