ރައްޔިތުންގެ މަޖިލީހުގެ މެޖޯރިޓީ ލީޑަރު އިނގުރައިދޫ ދާއިރާގެ ޕީއެންސީ މެންބަރު އިބްރާހިމް ފަލާހުގެ ނަމުގައި ޑޮލަރު ގަނެވިއްކާ ކުންފުންޏެއް އުފައްދާފައިވާކަން އޭނާގެ މާލީ ބަޔާނުގައި ހިމަނައިފިއެވެ.
ވިހިވަނަ ރައްޔިތުންގެ މަޖިލީހުގެ މެންބަރުންގެ ދެވަނަ އަހަރުގެ މާލީ ބަޔާން އާއްމު ކޮށްފަިވާއިރު ފަލާހުގެ މާލީ ބަޔާނުން އެނގޭ ގޮތުގައި މިދިޔަ އަހަރުގެ ތެރޭގައި ދެ ކުންފުންޏެއް އޭނާ އުފެއްދެވިއެވެ.
އެއީ "ސަން ކަރަންސީ އެކްސްޗޭންޖު" ގެ ނަމުގައި އުފެއްދި ޑޮލަރު ގަނެވިއްކާ ކުންފުންޏަކާއި "ސަން ކްރަފްޓް ކޮންސްޓްރަކްޝަން" ގެ ނަމުގައި އުފައްދާފައިވާ ކޮންސްޓްރަކްޝަން ކުންފުންޏެކެވެ. އެ ދެ ކުންފުނީގެ ވެސް 90 ޕަސެންޓު ހިއްސާ ފަލާހުގެ އޮވެ އެވެ. އޭނާއަކީ އިތުރު ތިން ކުންފުންޏެއްގެ ވެސް ހިއްސާދާރެކެވެ.
ބަޔާނުން ދައްކާ ގޮތުގައި ފަލާހަށް މުސާރައިގެ ގޮތުގައި މަޖިލީހުން 990،000 ރުފިޔާ ލިބުނުއިރު ވިޔަފާރީގެ ނަފާގެ ގޮތުގައި މިދިޔަ އަހަރު އޭނާއަށް 1.8 މިލިއަން ރުފިޔާ ލިބުނެވެ. އަދި ކުލީގެ ގޮތުގައި މިދިޔަ އަހަރު 2.8 މިލިއަން ރުފިޔާ ލިބުނެވެ. މިދިޔަ އަހަރުގެ ތެރޭގައި ފަލާހު ވަނީ ބޭންކް އޮފް މޯލްޑިވްސް އިން 15 މިލިއަން ރުފިޔާގެ ލޯނެއް ވެސް ނަގައިފަ އެވެ.
އޭނާގެ ނަމުގައި ފަސް ބިން އެބައޮތެވެ. އެއީ މިދިޔަ އަހަރު 21 މިލިއަން ރުފިޔާއަށް ހުޅުމާލެއިން ގަނެފައިވާ ބިމަކާއި އިންނަމާދޫ ފަލަކް، ފަތް، އަސުރުހިޔާގެ އިތުރުން މާލެއިން ގަނެފައިވާ މ. އަސުރުކުރި އެވެ. މާލެއިން އޭނާ ގޯތި ގަތީ ހަތަރު މިލިއަން ރުފިޔާއަށް ކަމަށް ވެސް ބަޔާނުގައިވެއެވެ.
