ބަންގްލަދޭޝްގައި މަރުގެ އަދަބު އިއްވާފައިވީ ނަމަވެސް، އެ ގައުމުގެ ކުރީގެ ބޮޑުވަޒީރު ޝައިޚް ޙަސީނާ އަލުން ގައުމަށް އެނބުރި ވަޑައިގަތުމަށް ނިންމަވައިފިއެވެ.

އުމުރުފުޅުން 78 އަހަރުގެ ޙަސީނާ މިކަން އިޢުލާން ކުރެއްވީ ބުދަ ދުވަހު އިންޑިއާގައި ހުންނަވައިގެން ވީޑިއޯ ކޮންފަރެންސް މެދުވެރިކޮށް ބޭއްވި ނޫސްވެރިންގެ ބައްދަލުވުމެއްގައެވެ. 'ފޮރިން ކޮރެސްޕޮންޑެންޓްސް ކްލަބް އޮފް ސައުތު އޭޝިއާ' އިން އިންތިޒާމުކުރި މި ބައްދަލުވުމުގައި ޙަސީނާގެ ދަރިކަލުން ސަޖީބް ވާޒިދު ޖޯއީ އާއި އަވާމީ ލީގުގެ އިސް ބޭފުޅުން ބައިވެރިވެވަޑައިގެންނެވިއެވެ.

މި ބައްދަލުވުމުގައި ވާހަކަދައްކަވަމުން ޙަސީނާ ވިދާޅުވީ، ގައުމަށް ވަޑައިގަތުމުން ހައްޔަރުކޮށް ޖަލަށްލީ ނަމަވެސް، ރައްޔިތުންނަށްޓަކައި އަދާކުރަންޖެހޭ ވާޖިބަށް ހުރަސްއެޅުމަށް ބިރުވެރިކަމަށް ފުރުސަތު ނުދެއްވާނެ ކަމަށެވެ. އަދި ގައުމުގެ ރައްޔިތުން ތަހައްމަލު ކުރަމުންދާ ދަތިތަކާ ހުރެ، ގައުމުން ބޭރުގައި ހުންނަވަން ބޭނުންފުޅު ނުވާކަމަށް ވެސް އެކަމަނާ ވިދާޅުވިއެވެ.

ޙަސީނާ އިތުރަށް ވިދާޅުވި ގޮތުގައި، އެކަމަނާ އެނބުރި ވަޑައިގަންނަވާނެ ވަކި ތާރީޚެއް ފަހުން އިޢުލާން ކުރެއްވި ނަމަވެސް، އުންމީދު ކުރައްވަނީ މިއަހަރުގެ ޑިސެމްބަރު މަހު ގައުމަށް ވަޑައިގަތުމަށެވެ. މީގެ އިތުރުން އެކަމަނާގެ ޕާޓީ، އަވާމީ ލީގަށް ކުރަމުންދާ ހުރަސްތައް ނައްތާލުމަށް ވެސް ވަނީ ގޮވާލައްވާފައެވެ. ނަމަވެސް، މިހާރުގެ ވަގުތީ ސަރުކާރާއެކު އެއްވެސް މަޝްވަރާއެއް ކުރިއަށް ނުދާކަމަށް ޙަސީނާގެ ދަރިކަލުން ވިދާޅުވިއެވެ.

2024 ވަނަ އަހަރު ބަންގްލަދޭޝްގައި ދަރިވަރުން އިސްވެ ތިބެ ކުރި މުޒާހަރާތަކާ ގުޅިގެން ޙަސީނާގެ ވެރިކަން ވެއްޓުމުން، އެކަމަނާ ފިއްލަވައިގެން ވަޑައިގަތީ އިންޑިއާއަށެވެ. އޭގެ ފަހުން ބަންގްލަދޭޝްގެ ކޯޓަކުން ވަނީ އިންސާނިއްޔަތާ ޚިލާފު ޖަރީމާތައް ހިންގުމާއި، މީހުން މެރުމަށް އަމުރުކުރުމުގެ ކުށުގައި ޙަސީނާގެ މައްޗަށް މަރުގެ އަދަބު އިއްވާފައެވެ.

ބަންގްލަދޭޝްގެ މިހާރުގެ ސަރުކާރުން ދަނީ ޙަސީނާ އެ ގައުމާ ހަވާލުކުރުމަށް އިންޑިއާ ސަރުކާރުގައި ތަކުރާރުކޮށް އެދެމުންނެވެ. މި މައްސަލައިގެ ސަބަބުން ދެ ގައުމުގެ ގުޅުމަށް ވަނީ ނުތަނަވަސްކަން ވެރިވެފައެވެ.