ރާއްޖެ އާއި އަވައްޓެރި އިންޑިއާ ދެމެދު އޮތް ގުޅުމަކީ ދެ ގައުމުގެ ރައްޔިތުންގެ ދެމެދުގައިވާ ޒަމާންވީ ގުޅުމެއް ކަމަށާއި ރާއްޖެއިން ބޭނުންވި ކޮންމެ ފަހަރަކު އިންޑިއާ އިން ކޮންމެ ދަނޑިވަޅެއްގައި ވެސް ރާއްޖެއަށް އެހީތެރިވާ ކަމަށް ރާއްޖޭގެ ޚާރިޖީ ވަޒީރު ޑރ. އަބްދުﷲ ހަލީލް ވިދާޅުވެއްޖެއެވެ.

ޑރ. ހަލީލް މިހެން ވިދާޅުވީ ރޭ އިންޑިއާގެ ޖުމްހޫރީ ދުވަހުގެ މުނާސަބަތުގައި، ސޯޝަލް ސެންޓަރުގައި ބޭއްވި ރަސްމިއްޔާތުގައެވެ.

ހަލީލް ވަނީ އިންޑިއާގެ ރައީސް ދުރޫޕަދީ މުރްމޫއަށާއި ބޮޑުވަޒީރު ނަރެންދުރަ މޯދީގެ އިތުރުން އެ ގައުމުގެ އެންމެހާ ރައްޔިތުންނަށް ޖުމްހޫރީ ދުވަހުގެ ތަހުނިޔާއާއި ހެޔޮއެދުންތައް ރައީސް ޑރ. މުހައްމަދު މުއިއްޒުގެ ނަންފުޅުގައި ފޮނުއްވައިފައެވެ.

މީގެ އިތުރުން ވަޒީރު ވަޒީރު ވިދާޅުވީ ދެ ގައުމުގެ ދެމެދުގައި އޮތް އެކުވެރިކަމަކީ ހަމައެކަނި ތާރީހީ ފަތްފުށްތަކުން ފެންނަން އޮތް ގުޅުމެއް ނޫން ކަމަށާއި، އެއީ އަމަލީ ގޮތުން ރާއްޖޭގެ ތަރައްގީއާއި ދިވެހިންގެ ދިރިއުޅުމާ ގުޅިފައިވާ ބަދަހި ގުޅުމެއް ކަމަށެވެ.

"އިންޑިއާއަކީ ޒަމާނުއްސުރެ ރާއްޖެއަށް އެހީތެރިވެދޭ ގައުމެއް. އަދި އިންޑިއާއިން ފޯރުކޮށްދޭ އެހީތަކުގެ ސަބަބުން ދިވެހިންނަށް އެތަކެއް ފައިދާތަކެއް ލިބޭ. ރާއްޖޭގެ މިހާރުވެސް އެތަކެއް އިންޑިއާ މީހުން އެބަތިބި ޚިދުމަތް ކުރަން. އިންޑިއާގެ ޑޮކްޓަރުންނާއި، ނަރުހުންނާއި، ޓީޗަރުންގެ ފަރާތުން ފެނިގެންދަނީ، ރާއްޖެއަށް އޮންނަ ލޯތްބާއި އިޚްތިރާމް" ވަޒީރު ވިދާޅުވިއެވެ.

އިންޑިޔާގެ ޖުމްހޫރީ ދުވަސް ފާހަގަ ކުރަނީ އެ ޤައުމުގެ ޤާނޫނު އަސާސީ އެކުލަވާލާ، ޢަމަލު ކުރަން ފެށި ދުވަހާއި ގުޅުވައިގެންނެވެ. އެއީ 1950 ވަނަ އަހަރުގެ ޖެނުއަރީ މަހުގެ 26 ވަނަ ދުވަހެވެ. އަދި އެ ދުވަހަކީ އިންޑިޔާގެ ފުރަތަމަ ރައީސް ޑޮކްޓރ ރަޖެންދްރާ ޕްރަސާދް، ރައީސްކަމުގެ ހުވާ ކުރެއްވި ދުވަހެވެ.