މީޑިޔާތަކުގެ މިނިވަންކަން ވަރަށް ބޮޑަށް ހަނިވާ ގޮތަށް ހަދައި، ރައްޔިތުންގެ މަޖިލީހަށް ހުށަހަޅާފައިވާ މީޑިޔާ ބިލުގެ ޑްރާފްޓް ކުރުމުގެ އެއްވެސް މަރުހަލާއެއްގައި މަޝްވަރާވެސް ކޮށްފައިނުވާ ކަމަށާއި، އެ ބިލާ ދެކޮޅުކަން މޯލްޑިވްސް ބްރޯޑްކާސްޓިންގ ކޮމިޝަނުން މިއަދު ހާމަކޮށްފިއެވެ.
އެ ކޮމިޝަނުން މިކަން ހާމަކުރީ، ތުޅާދޫ ދާއިރާގެ މެމްބަރު އަބްދުލްހަންނާން އަބޫބަކުރު މަޖިލީހަށް ހުށަހަޅައި، ސަރުކާރު ހިންގާ ޕީއެންސީގެ ގިނަ މެމްބަރުން ތާއީދު ކޮށްފައިވާ ބިލު ދިރާސާ ކުރުމުގެ މަރުހަލާފައި މަޖިލީހުގެ މިނިވަން މުއައްސަސާތަކާބެހޭ ކޮމިޓީއަށް، ބްރޯޑްކޮމްގެ މެމްބަރުން ޙާޒިރު ކުރުމުން އެކަމާ ދެއްކި ވާހަކައިގައެވެ.
މީޑިއާގެ މިނިވަންކަން ހަނިކުރެވޭ ގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލު އޮތީ ތަންފީޒު ކުރެވޭ ގޮތަކަށް ނޫން ކަމަށާއި ރަނގަޅު ދިރާސާއެއް އަދި މަޝްވަރާކުރުމެއް ނެތި ހުށަހަޅާފައިވާ އެ ބިލަށް ތާއިދު ނުކުރާކަން ބްރޯޑްކާސްޓިން ކޮމިޝަން (ބްރޯޑްކޮމް) އިން މިއަދު ހާމަކޮށްފި އެވެ.
ބްރޯޑްކާސްޓިންގ ކޮމިޝަނުގެ ރައީސް، ސަފާ ޝަފީގު މިއަދު އޮތް ކޮމިޓީ ބައްދަލުވުމުގައި ވިދާޅުވީ މީޑިޔާތަކާއި ގުޅުން ހުރި މިވަރުގެ ބިލެއް މަޖިލީހަށް ހުށަހަޅާއިރު، އެކަމާގުޅުން ހުރި ގިނަ ފަރާތްތަކަކާއެކު މަޝްވަރާކޮށް ދިރާސާތަކެއް ހަދަންޖެހޭނެ ކަމަށް ގަބޫލު ކުރައްވާ ކަމަށެވެ. ނަމަވެސް މި ބިލު މަޖިލީހަށް ހުށަހަޅައި، ބަލައިގެންފައިވާއިރު އެފަދަ އެއްވެސް ކަމެއް ކޮށްފައި ނެތް ކަމަށާއި، މިކަމާމެދު މަޝްވަރާ ކުރުމަށް އެ ކޮމިޝަނުންވެސް ތިން ފަހަރެއްގެ މަތިން ސިޓީ ފޮނުވާފައިވާނެ ކަމަށް ވިދާޅުވިއެވެ.
ސޮފާ ވިދާޅުވީ، މީޑިޔާތައް ރެގިއުލޭޓްކޮށް ފިޔަވަޅު އަޅާގޮތަށް ގާނޫނެއް ހެދުމުގެ ކުރިން ގައުމީ ފެންވަރުގެ ދިރާސާއެއް ކުރަންޖެހޭނެ ކަމަށެވެ. އަދި މީޑިޔާ ކައުންސިލާއި ބްރޯޑްކާސްޓިންގ ކޮމިޝަން އެއްކޮށްލައި، އެންމެ ކޮމިޝަނެއް އުފައްދާއިރު، މީގައި އެންމެ ރަނގަޅު ގޮތެއް ހޯދުމަށް ގިނަ މަޝްވަރާތަކެއް ކުރުން މުހިންމު ކަމަށް ވިދާޅުވިއެވެ.
އޭނާ ވިދާޅުވީ، މީޑިޔާގެ މިނިވަންކަމާއި ޚިޔާލުފާޅުކުރުމުގެ މިނިވަންކަމާއި ގުޅުން ހުރި މިފަދަ ގާނޫނެއް ހެދުމުގެ ކުރިން ބަލަންޖެހޭ އެހެން ކަންކަންވެސް އެބަހުރި ކަމަށެވެ. އެގޮތުން ރާއްޖެއިން ސޮއި ކޮށްފައިވާ އެފަދަ މުއާހަދާތަކާ ފުށުއެރުން ހުރިތޯވެސް ބަލަންޖެހޭނެ ކަމަށް ސޮފާ ވިދާޅުވިއެވެ.
ކޮމިޝަނުގެ ރައީސް ވިދާޅުވީ، މިހާރު އޮތް މީޑިޔާ ބިލު ތަންފީޒު ނުކުރެވޭނެ ކަމަށާއި، އެކަން ތަންފީޒު ކުރަން ބަލާއިރު، އެފަދަ ވަސީލަތްތަވެސް ނެތްކަން އޭނާ ފާހަގަ ކުރެއްވިއެވެ. އޭނާ ވިދާޅުވީ މި ބިލު ނޫސްވެރިންނަށްވެސް ބަލައިގަންނަން ފަސޭހަވީހީ މަޝްވަރާ ކުރަންޖެހޭ ފަރާތްތަކާއި މަޝްވަރާކޮށްގެން މަޖިލީހަށް ގެނައި ނަމައެވެ.
ކޮމިޝަނުގެ ނައިބު ރައީސްގެ އިތުރުން ކޮމިޝަނުގެ އެހެން މެމްބަރުންވެސް މި ބިލާމެދު ވާހަކަ ދެއްކެވީ ބިލާ ދެކޮޅަށެވެ. ހުރިހާ މެމްބަރުންވެސް އެއްބަސްވެވަޑައިގަންނަވާ ގޮތުގައި މީޑިޔާ ބިލު މިހާރު އޮތްގޮތުން ނޫސްވެރިކަމުގެ މިނިވަންކަމަށް ބޮޑެތި ހުރަސްތަކެއް އެޅިގެންދާނެއެވެ.
މިހާރު މަޖިލީހަށް ހުށަހަޅާފައިވާ މީޑިޔާ ބިލުގައި، މީޑިޔާ ކައުންސިލާއި ބްރޯޑްކާސްޓިންގ ކޮމިޝަން އުވާލައި، އެއް ކޮމިޝަނެއް އުފެއްދުމާއި، މީޑިޔާތަކާއި ވަކިވަކި ނޫސްވެރިން ބޮޑެތި އަދަދުތަކުން ޖޫރިމަނާ ކުރުމާއި، މީޑިޔާތަކުގެ ރަޖިސްޓްރީ އާއި ލައިސަންސް ހިފަހައްޓައި މީޑިޔާތައް ބަންދު ކުރުމުގެ ފުރުޞަތުވެސް އަލަށް ހަދާ ކޮމިޝަނަށް ދީފައިވެއެވެ.
މި ބިލާ ދެކޮޅަށް ނޫސްވެރިންނާއި މީޑިޔާތަކާއި، ނޫސްވެރިކަމާ ގުޅުހުން ހުރި ހުރިހާ މުވައްސަސާތަކުންނާއި ޖަމްއިއްޔާ ތަކުން ދަނީ އަޑު އުފުލަމުންނެވެ. މިކަމާއި ގުޅިގެން ނޫސްވެރިން ވަނީ އިހުތިޖާޖުވެސް ކޮށްފައެވެ. ހުރިހާ ފަރާތްތަކުންވެސް ގޮވާލަމުން ދަނީ މީޑިޔާ ބިލު ބޭރު ކުރުމަށެވެ.
