ރޯދަ މަހުގެ ޑިސްކައުންޓް ކަރަންޓު ބިލުން ދިނަސް، ރޯދަ މަހުގެ ކަރަންޓު ބިލު ބޮޑުވެގެން އުޅެނީ ހޫނު ގަދަކަމުން ކަރަންޓު ބޭނުންކުރާ މިންވަރު އިތުރުވުމުން ކަމުގައި ކަރަންޓުގެ މައި ކުންފުނި ކަމަށްވާ ސްޓެލްކޯއިން ބުނެފިއެވެ.
ސަރުކާރުން ބުނެފައި ވަނީ ރޯދަ ހަދިޔާގެ ގޮތުގައި ކޮންމެ ކަރަންޓު ބިލަކުން 10 ޕަސެންޓް ދޭނެ ކަމަށެވެ. ސްޓެލްކޯގެ މީޑިޔާ އޮފިޝަލު އަހްމަދު މުހައްމަދު ވިދާޅުވެފައި ވަނީ 10 ޕަސެންޓް ޑިސްކައުންޓް ދީފައިވާނެ ކަމަށާއި ނަމަވެސް ރޯދަ މަސް ދިމާވީ ހޫނު މޫސުމަށް ކަމަށްވާތީ ހޫނު ގަދަކަމުން އާންމުން ކަރަންޓު ބޭނުންކުރި މިންވަރު މަތިވީ ކަމަށެވެ. އޭނާ ވިދާޅުވީ ރޯދަ މަހު ކަރަންޓު ބޭނުންކުރި މިންވަރު މައްޗަށް ބޮޑަށް ގޮސްފައި ވަނީ މެންދުރު ފަހު ބަދިގޭގައި ކައްކާ ގަޑި އާއި އިޝާނަމާދަށް ފަހު ތަރާވީސް ގަޑީގައި ކަމަށެވެ.
އޭނާ ވިދާޅުވީ ބަޔެއް ގެތަކަށް ރޯދަ ޑިސްކައުންޓް 1400 ރުފިޔާއިން 1700 ރުފިޔާގެ މިންވަރުވެސް ދެވިފައިވާނެ ކަމަށެވެ.
ނަމަވެސް އާންމުން ސޯޝަލް މީޑިޔާގައި ޝަކުވާ ކުރަމުން ދަނީ ރޯދަ މަހު ޑިސްކައުންޓް ދިނުމުން އެހެން މަސް ތަކަށްވުރެވެސް ކަރަންޓު ބިލު ބޮޑުވީ ކީއްވެތޯއެވެ. ބަޔެއް މީހުން ސްޓެލްކޯއަށް ފާޑު ކިޔައި ބުނެފައި ވަނީ ކުރީ މަސްތަކުގެ ބިލަށްވުރެ ރޯދަ ޑިސްކައުންޓާއެކު އައި ބިލު އެތައް ގުނައެއް ބޮޑުވާން ޖެހުނު ސަބަބެއް ނުވިސްނޭ ކަމަށެވެ.
