އއ. ރަސްދޫގައި ހިނގި އަލިފާނުގެ ހާދިސާއެއްގައި ފިހިގެން މާލެ ގެނައި ދެމަފިރިންވެސް ވެންޓިލޭޓަރަށްލައި ފަރުވާ ދޭން ފަށައިފިއެވެ.

ރޭ ދަންވަރު މާލެ ގެނައި މިދެމަފިރިން ފިހިފައި ވަނީ އެމީހުން ނިދާ ކޮޓަރީގައި ހިނގި އަލިފާނުގެ ހާދިސާއެއްގައި ކަމަށްވެއެވެ. މިއީ 31 އަހަރުގެ ދެމަފިރިންނެވެ.

މައުލޫމާތު ލިބިފައިވާ ގޮތުގައި އަންހެންމީހާ އޮތީ އައިސީޔޫގެ ވެންޓިލޭޓަރުގައެވެ. ފިރިހެން މީހާ އޮތީ އިމަޖެންސީ ރޫމުގެ ވެންޓިލޭޓަރުގައެވެ. ފިރިހެން މީހާވެސް އައިސީޔޫއަށް ބަދަލު ކުރަން އައިޖީއެމްއެޗުން މަސައްކަތް ކުރަމުންދާ ކަމަށްވެއެވެ. އައިސީޔޫއިން ޖާގަ ލިބުނުހާ އަވަހަކަށް އޭނާވެސް އައިސީޔޫއަށް ބަދަލުކުރާނެ ކަމަށްވެއެވެ. އެނގިފައިވާ ގޮތުގައި ދެމަފިރިންގެ 90 ޕަސެންޓް ވަނީ ފިހިފައެވެ.

މި ދެމަފިރިންގެ ކުޑަ ކުއްޖަކުވެސް ހުރެއެވެ. އެއީ އުމުރުން އެންމެ 5 އަހަރުގެ ކުއްޖެކެވެ. މާލެ ޓައިމްސްއަށް ލިބުނު މައުލޫމާތުން މި ދެމަފިރިން ސަލާމަތް ކުރެވޭނެ ކަމުގެ އުންމީދު ޑޮކްޓަރުން މިހާރު ވަނީ ކަނޑާލާފައެވެ.

ދެމަފިރިންގެ ގައިގައި މިހާ ބޮޑަށް އަލިފާން ރޯވެ ފިހުނު ނަމަވެސް ކޮޓަރީގައި ރޯވެފައި ވަނީ ހަމައެކަނި ދޮރު ފޮތިގަނޑެއްގައި އެކަނި ކަމަށްވެއެވެ. އެހެންކަމުން ދެމަފިރިންގެ ގައިގައި އެހާބޮޑަށް އަލިފާން ހިފައި ފިހުނު ސަބަބަބެއް އަދި ނޭނގެއެވެ. އެކަމަކު މި ދެމަފިރިންގެ މެދުގައި ދޭތެރެދޭތެރެއިން މައްސަލަ ޖެހި ޒުވާބު ހިނގާ ކަމަށް ރަސްދޫ ބަޔެއް މީހުން ބުނެއެވެ.

ފިރިހެން މީހާގެ ގައިގައި އަލިފާން ހިފުމުން އޭނާ ވަނީ ގެއިން ނުކުމެ މަގުމަތިން ދިޔަ ސައިކަލެއްގެ ފަހަތުގައި ހޮސްޕިޓަލަށް ގޮސްފައެވެ. އަދި ދިޔަ މަގުމަތީގައި އޭނާ ބުނި ކަމަށްވަނީ ގޭގައި އަލިފާން ރޯވެފައިވާ ކަމަށެވެ. ނަމަވެސް ގޭގައި އިތުރު ބަޔަކު އުޅޭކަން އޭނާ ސައިކަލުގައި އިން މީހާގެ ކައިރީގައި ނުބުނާ ކަމަށްވެއެވެ.

ގޭގައި އަލިފާން ރޯވެފައިވާ ވާހަކަ އޭނާ ބުނުމުން ރަސްދޫ ބަޔެއް މީހުން ވަނީ އެގެއަށް ގޮސްފައެވެ. ދިޔައިރު އަންހެން މީހާގެ ގައިގައިވެސް ވަނީ އަލިފާން ރޯވެ ފިހިފައެވެ.