ރާއްޖޭގައި ތިބި ތެލަސީމިޔާ ކުދިންނަށް ބޭނުންވާ ފަރުވާގެ އެހީތެރިކަން އެންމެ ފުރިހަމަ ގޮތުގައި ފޯރުކޮށް ދިނުމަކީ ދިވެހި ދައުލަތަށް ލާޒިމު ކަމެއް ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ މޯލްޑިވްސް ބްލަޑް ސާވިސްއަށް ލިބިފައި ހުރި ފިލްޓަރ ތަކަށް މައްސަލަ ދިމާވުމުގެ ސަބަބުން ތެލަސީމިޔާ ކުދިންގެ ބެލެނިވެރިން ކުރި މުޒާހަރާއާއި ގުޅިގެން އެކްސްގައި ކުރެއްވި ޕޯސްޓެއްގައެވެ. މުޒާހަރާގައި އެފަރާތްތަކުން ވަނީ ހެލްތް މިނިސްޓްރީގެ އިސްވެރިންގެ އިސްތިއުފާއަށްވެސް ގޮވާލާފައެވެ. މުޒާހަރާކުރި ބެލެނިވެރިން ބުނަމުން ދިޔައީ ތެލަސީމިޔާ ކުދިންނަށް ކޮންމެހެން ދޭންޖެހޭ ފަރުވާ މިހާރު ނުދެވޭ ކަމަށެވެ.
ޝާހިދު ކުރެއްވި ޕޯސްޓުގައި ވިދާޅުވީ، ތެލެސީމިޔާގެ ފަރުވާ ގެ ބޭނުން ޖެހިފައިވާ ކުޑަކުދީންނާއި މީހުންނަކީ ދައުލަތުން ޚާއްސަ ގޮތެއްގައި އެހީ ފޯރުކޮށް ދޭންޖެހޭ ބައެއް ކަމަށެވެ.
"އެފަރާތްތަކަށް ބޭނުންވާ ފުރިހަމަ އެހީތެރިކަން ފޯރުކޮށް ދިނުމަކީ ދައުލަތުގެ މައްޗަށް ލާޒިމު ކަމެއް." ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވި ގޮތުގައި ރައްޔިތުންގެ އެއްވެސް ޙައްޤަކަށް ހުރުމަތްތެރިކޮށް ހިތުމުގެ ކުޑަވެސް ވިސްނުމެއް މިސަރުކާރުގަ ނެތެވެ. އެކަން ދަނީ އެނގި ކަށަވަރު ވެގެން ކަމަށްވެސް ވިދާޅުވިއެވެ.
"ރައްޔިތުން ކޮންމެ ދުވަހަކުމެ ނުކުމެ ތިބެން މިޖެހެނީ ކޮންމެވެސް ޙައްގެއް ހޯދުމަށް އެދި އާދޭސް ކުރުމުގައި" ޝާހިދު ވިދާޅުވިއެވެ.
ތެލަސީމިޔާ ކުދިންގެ ބެލެނިވެރިންގެ މުޒާހަރާގައި އެ ފަރާތްތަކުން ބުނިގޮތުގައި ސެންޓަރުގެ އެތެރެވެސް ވަނީ ވަރަށް ބޮޑަށް ބާވެ، ވީރާނާވެފައެވެ. އަދި ސެންޓަރުން ދެމުންދާ ޚިދުމަތްތައްވެސް އެއްދުވަހުން އަނެއް ދުވަހަށް ދޯދިޔާވެ ލޭ އަޅާ ކުދިންނާއި މީހުންނަށް ދަނީ އެތައް ތަކުލީފުތަކެއް ކުރިމަތި ވަމުންނެވެ.
