އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ) އަންނަ އަންގާރަ ދުވަހުވެސް ފުލުހަށް ހާޒިރުވާން އަންގައިފިއެވެ.
މަންދީ ފުލުހަށް ހާޒިރު ކުރަނީ، މިދިޔަ ހަފްތާގެ ހޯމަ ދުވަހުގެ ރޭ، ސުލްހަވެރިކަމާއެކު އެއްވެ އުޅުމުގެ ގާނޫނާ ޚިލާފަށް މާލޭގެ އެކި ސަރަހައްދުތަކުގެ މަގުތަކަށް އެއްވެ، އަޑުގަދަކޮށް މުޒާހަރާ ކުރުމުންނެވެ. އަދި، އާންމު ދަތުރުފަތުރަށް ދަތިވާނެހެން ހަރަކާތްތެރިވުމުން ކަމަށާއި ފުލުހުންގެ ދައުރު އަދާކުރުމަށް ހުރަސް އަޅާފައިވާކަމަށް ތުހުމަތުކުރެވޭ މައްސަލައިގައެވެ.
މި މައްސަލައިގައި މަންދީ ވަނީ މިއަދު މެންދުރު ފަހުވެސް ފުލުސް އޮފީހަށް ހާޒިރު ކޮށްފައެވެ. މިއަދު ފުލުހަށް ހާޒިރުވުމަށްފަހު މަންދީ ބުނީ އަންގާރަ ދުވަހު ދާން އަންގާފައި ވަނީ މާފަންނު ޕޮލިހަށް ކަމަށެވެ.
މަންދީގެ އިތުރުން އެ ޕާޓީގެ އެކްޓިވިސްޓް ފާތިމަތު ޝިއުނާވެސް ފުލުހަށް ހާޒިރުވާން ވަނީ އަންގާފައެވެ.
