ފޮރިން މިނިސްޓްރީގައި 132 ސިޔާސީ މުވައްޒަފުން އެބަތިބި ކަމަށް ފޮރިން މިނިސްޓަރ އަބްދުﷲ ޚަލީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުޙަންމަދު އިބްރާހީމް ލިޔުމުން ޖަވާބަކަށް އެދި މިނިސްޓަރ ޚަލީލަށް ސުވާލު ކުރެއްވުމުން، ޚަލީލު ދެއްވި ޖަވާބު މިއަދު ވަނީ މަޖިލީހުގެ ތަޅުމުގައި އިއްވާފައެވެ.
ޚަލީލު ވިދާޅުވެފައި ވަނީ 132 ސިޔާސީ މުވައްޒަފުން މިވަގުތު ފޮރިން މިނިސްޓްރީގައި އެބަތިބި ކަމަށާއި، އެއީ މިނިސްޓްރީ އާއި ރާއްޖެއިން ބޭރުގައި ހުރި މިޝަންތަކުގައި ތިބި ހުރިހާ ސިޔާސީ މުވައްޒަފުން ލައިގެން ކަމަށެވެ.
132 ސިޔާސީ މުވައްޒަފުން ތިބިއިރު، ފޮރިން ސާވިސްގެ މުވައްޒަފުންގެ އަދަދަކީ 139 ކަމަށްވެސް ޚަލީލުގެ ޖަވާބުގައިވެއެވެ.
ޚަލީލުގެ ޖަވާބުގައި އިތުރަށް ވިދާޅުވެފައިވާ ގޮތުން ކުރީގެ ސަރުކާރުގައި ފޮރިން މިނިސްޓްރީގައި 116 ސިޔާސީ މުވައްޒަފުން ތިއްބެވެ. އޭރު ފޮރިން ސާވިސް މުވައްޒަފުންގެ ގޮތުގައި 137 މުވައްޒަފުން ތިބި ކަމަށް ވިދާޅުވެފައިވެއެވެ.
