ރޯޔަލް އައިލެންޑުގައި، ސުޕްރީމް ކޯޓުގެ އުއްތަމަ ފަނޑިޔާރާއި ރައްޔިތުންގެ މަޖިލީހުގެ ނައިބު ރައީސް އަދި ގާސިމްވެސް ހިމެނިވަޑައިގަންނަވާ ގޮތަށް ބައްދަލު ކުރައްވައި، ސުޕްރީމް ކޯޓުގެ ފަނޑިޔާރުންނާބެހޭ ގޮތުން ސިއްރު ރޭވުމެއް ރޭވި ކަމަށް ދެކެވޭ ވާހަކަތައް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހީމް ދޮގު ކުރައްވައިފިއެވެ.

ރަޖިސްޓްރީ ނުކޮށް ހިންގާ އޮންލައިން ނޫހެއްގައި ޝާއިއު ކޮށްފައިވާ އާޓިކަލާއި ގުޅިގެން ގާސިމް ނެރުއްވި ބަޔާނެއްގައި ވިދާޅުވީ، ރޯޔަލް އައިލެންޑަކީ އޭނާގެ ވިލާ ކުންފުނިން ހިންގާ ރިސޯޓެއް ނަމަވެސް އެ ރިސޯޓަށް އޭނާ ވަޑައިނުގަންނަވާތާ މިހާރު ތިން އަހަރު ވެދާނެ ކަމަށެވެ. ގާސިމް ވިދާޅުވީ އެ ނޫހުގައި ލިޔެފައިވާ ލިޔުމަކީ އެއްވެސް ހަގީގަތެއް ނެތް ލިޔުމެއް ކަމަށެވެ.

އަދި ވިދާޅުވީ އެފަދަ ލިޔުންތައް

"މި އާޓިކަލްގައި ހަޤީޤަތް ނެތް މިންވަރުގެ ފުރިހަމަ އެއް މިސާލަކީ، 2025 ވަނަ އަހަރު ޖަނަވަރީ މަހު، މާލެއިން ރޯޔަލް އައިލެންޑަށް އަޙްމަދު ނާޒިމް ( މަޖިލިސް ނައިބު ރައީސް ) ވަޑައިގެން އަޅުގަނޑާއި ، އުއްތަމަ ފަނޑިޔާރާއި، މުހައްމަދު ޝިހާބު ރޯޔަލް އައިލަންޑުގައި ބައްދަލު ކުރިކަމަށްލިޔެފައި ވުމެވެ. އަޅުގަނޑުގެ ކުންފުނިން ހިންގާ ރިސޯޓެއް ނަމަވެސް އަޅުގަނޑު  ރޯޔަލް އައިލެންޑް އަށް ނުދާތާވެސް މިހާރު 3 އަހަރު ވެދާނެއެވެ. އެންމެ ފަހުން އަޅުގަނޑު ރޯޔަލް އައިލަންޑް އަށް ގޮސްފައިވާނީ 2022 ވަނަ އަހަރުގެ ފެބްރުއަރީ 5  ވަނަ ދުވަހު އޮތް ށ އަތޮޅު ކޮމަންޑޫ ދާއިރާގެ ރައްޔިތުންގެ މަޖިލީހުގެ ބައިއިލެކްޝަން ގައި ށ ކޮމަންޑޫ ދާއިރާއަށް ކުރި ދަތުރުގެ ތެރޭގައެވެ." ގާސިމްގެ ބަޔާނުގައި ވިދާޅުވެފައިވެއެވެ.

ގާސިމް ވިދާޅުވީ މުޙަައްމަދު ޝިހާބުވެސް އަދި މިހާރުގެ އުއްތަމަ ފަނޑިޔާރުވެސް ރޯޔަލް އައިލަންޑް ރިސޯޓަށް 2024 އަދި ހިނގަމުން މިދާ 2025 ވަނަ އަހަރުގެ މިހިސާބަށް އައިއިރުވެސް ރޯޔަލް އައިލެންޑަށް އެއްވެސް ބޭނުމަކު ވަޑައިގެންފައި ނުވާކަމަށެވެ.

ގާސިމް ވިދާޅުވީ އެފަދަ ލިޔުންތައް ނެރެނީ މުޖުތަމައު ފަސާދަ ކުރުމުގެ ބޭނުމުގައި ކަމަށާއި، އޭނާ އާއި އުއްތަމަ ފަނޑިޔާރާއި މަޖިލީހުގެ ނައިބު ރައީސް އަދި މުޙަންމަދު ޝިހާބާއި ގުޅުވައިގެން ރައްޔިތުންގެ މެދުގައި ފިތުނަ އުފެދޭ ގޮތަށް އެއްވެސް ހަޤީޤަތެއް ނެތި ސިޔާސީ ބޭނުމުގައި ވަކި ބަޔަކު އޮންލައިން ނޫސްތަކުގައި ފަތުރާ އަދި ފަތުރަމުން ދާ މިފަދަ  ދޮގު ވާހަކަތައް ހުއްޓުވައި ދިނުމަށް ކަމާބެހޭ ފަރާތްތަކަށް ގޮވާލައްވާ ކަމަށެވެ.

"ނޫސްވެރިކަމާއި ޚިޔާލު ފާޅުކުރުމުގެ މިނިވަން ކަމަކީ، ހަޤީޤަތެއް ނެތް ދޮގު ވާހަކަ ފަތުރާ ސިޔާސީ މަޤްޞަދުތައް ހާސިލް ކުރުމުގެ ބޭނުމުގައި މުޖުތަމަޢު ފަސާދަ ކުރުމަށްއޮތް ލައިސަންސެއް ކަމަށް ދެކި، މިފަދަ ޢަމަލު ތައް ތަކުރާރު ކުރާފަރާތް ތަކަށް ޤާނޫނީ ފިޔަވަޅު އެޅިގެން ނޫނީ މިފަދަ ކަންކަން ހުއްޓުމަކަށް ނާންނާނެއެވެ." ގާސިމްގެ ބަޔާން ނިންމާލައްވަމުން ވިދާޅުވިއެވެ.