ތައުލީމީ ނިޒާމަށް ސިޔާސީ ނޫފޫޒު ވެއްދުމަކީ މި ޖީލަށް ދެއްކި ހުތުރު ނަމޫނާއެއް: ޝާހިދު

ތައުލީމީ ނިޒާމަށް ސިޔާސީ ނޫފޫޒު ވެއްދުމަކީ މި ޖީލަށް ދެއްކި ހުތުރު ނަމޫނާއެއް: ޝާހިދު

ތައުލީމީ ނިޒާމްގެ ތެރެއަށް ސިޔާސީ ނޫފޫޒު ވެއްދުމަކީ، ރައީސް ޑރ. މުއިއްޒުގެ ސަރުކާރުން މިއަދުގެ ޖީލަށް ދެއްކި ހުތުރު ނަމޫނާއެއް ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ، ޖަމާލުއްދީން ސުކޫލްގެ ކުރީގެ ދަރިވަރު އަދި މިހާރު ރައްޔިތުންގެ މަޖިލީހުގެ މެމްބަރު މީކާއިލް އަހްމަދު ނަސީމް އާބެހޭ ގޮތުން ޖަމާލުއްދީން ސްކޫލްގެ ސޯޝަލް މީޑިއާގައި ކުރި ޕޯސްޓް ފަހުން ޑިލީޓް ކުރި މައްސަލައިގައެވެ. އެ ޕޯސްޓަކީ އެ ސްކޫލްގެ ކުރީގެ ދަރިވަރުންގެ ތެރެއިން ސްކޫލުން ފާހަގަކޮށްލެވޭ ބޭފުޅުންނާ ބެހޭ ގޮތުން ޝާޢިއު ކުރަމުންދިޔަ ލިޔުންތަކުގެ ތެރެއިން ލިޔުމެކެވެ. ނަމަވެސް ފަހުން އެ ޕޯސްޓް ޑިލީޓް ކުރި އެޑިޔުކޭޝަން މިނިސްޓްރީން އަންގައިގެން ކަމުގެ ތުހުމަތު ވަނީ ކުރެވިފައެވެ.
މިކަމާމެދު ޝާހިދު މިއަދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ‏މެމްބަރު މީކާއިލް އަހުމަދު ނަސީމްފަދަ، ޖަމާލުއްދީން ސްކޫލު މިއަދު ހުރިހާ ގޮތަކުންވެސް ފަޚުރުވެރިވާ އިސް ދަރިވަރެއްގެ ޕްރޮފައިލް ސޯޝަލް މީޑިއާ ޕްލެޓްފޯމްތަކުގައި ހިއްސާ ކުރުމަށްފަހު, އެޑިއުކޭޝަން މިނިސްޓްރީގެ އެންގުމަށް އެ ޕްލެޓްފޯމް ތަކުން ފްރޮފައިލް ނެގުމުން، މިސަރުކާރުން ތައުލީމީ ނިޒާމް ސިޔާސީ ކޮށްފައިވާ މިންވަރު ވަރަށްވެސް ރަގަޅަށް ހަމަވެގެން ގޮސްފި ކަމަށެވެ. އަދި މި އަމަލަކީ މި ޖީލަށް ދައްކައިދިން "ހުތުރު ނަމޫނާ" އެއް ކަމަށްވެސް ވިދާޅުވިއެެވެ.
"ރައްޔިތުން ތަމްސީލުކުރާ މަންދޫބުންނާމެދު ދަރިވަރުންގެ ހިތްތަކުގައި ނުރަގަޅު ތަސައްވުރެއް އުފައްދާ, ވަކީން ޚާއްސަކޮށް އިއްޒަތްތެރި މެމްބަރު މީކާއިލް އަހުމަދު ނަސީމުގެ އަބުރަށް ހުތުރުވާގޮތަށް އަމަލުކޮށް, އުގަންނައިދޭ މަރުކަޒުތަކުގެ ތެރެއަށް މިސަރުކާރުން ސިޔާސީ ނުފޫޒު ވެއްދުމަކީ އަދުގެ ޒުވާން ޖީލަށް ދައްކުވައިދޭ ވަރަށް ހުތުރު ނަމޫނާއެއް." ޝާހިދު ވިދާޅުވިއެެވެ.
އެޑިޔުކޭޝަން މިނިސްޓްރީން، ޖަމާލުއްދީން ސްކޫލަށް އަންގައިގެން ހިންގި މި އަމަލު ޝާހިދު ވަނީ ކުށްވެރި ކުރައްވާފައެވެ. އަދި ތައުލީމީ ނިޒާމު ސިޔާސީ ނުކުރުމަށް ވެސް ޝާހިދު ގޮވާލެއްވިއެވެ.
"އެޑިއުކޭޝަން މިނިސްޓްރީގެ މިއަމަލު ހަރުކަށި އިބާރާތުން ކުށްވެރި ކުރަން. އަދި ތައުލީމީ ނިޒާމު ސިޔާސީ ނުކުރުމަށް މިސަރުކާރަށް ގޮވާލަން." ޝާހިދު ވިދާޅުވިއެެވެ.
މީކާއީލާގެ ޕޯސްޓް ޑިލީޓް ކުރި މައްސަލައިގައި ގިނަބަޔަކު އަންނަނީ އެކަމުގެ ކަންބޮޑުވުންތައް ފާޅު ކުރަމުންނެވެ.

ހިޔާލުފާޅު ކުރައްވާ!

Leave a Reply

Your email address will not be published. Required fields are marked *