ދަ ޑިމޮކްރެޓްސްގެ ރައީސްކަމުގެ މަގާމަށް، ރައްޔިތުންގެ މަޖިލީހުގެ މާފަންނު އުތުރު ދާއިރާގެ ކުރީގެ މެންބަރު އިމްތިޔާޒް ފަހުމީ (އިންތި) އަދި ނައިބު ރައީސަކަށް، އިނގުރައީދޫ ދާއިރާގެ ކުރީގެ މެމްބަރު މުޙަންމަދު ވަޙީދު (ވައްޑެ) އިންތިޚާބު ކޮށްފިއެވެ.
ރައީސާއި ނައިބު ރައީސް ހޮވުމަށް ބޭއްވި އިންތިޚާބުގައި، މި ދެމަގާމަށްވެސް ކުރިމަތިލެއްވީ އެންމެ ބޭފުޅެކެވެ. އެއީ އިންތި އާއި ވައްޑެ އެކަންޏެވެ.
ޑިމޮކްރެޓްސްގެ ރައީސް ކަމުގެ މަގާމު ހުސްވީ، އެ ޕާޓީ އުފެއްދުމަށްފަހު އިންތިޚާބު ކުރި ފުރަތަމަ ރައީސް، ހެންވޭރު ހުޅަނގު ދާއިރާގެ ކުރީގެ މެންބަރު ހަސަން ލަތީފު، އެ ޕާޓީ ދޫކުރައްވައި އެމްޑީޕީއަށް ސޮއި ކުރެއްވުމުންނެވެ. އަދި ނައިބު ރައީސްގެ މަގާމު ހުސްވީވެސް، އެ މަގާމުގައި ކުރިން ހުންނެވި، ރައީސް އޮފީހުގެ ކުރީގެ މިނިސްޓަރު މުހަންމަދު ޝިފާޒް، ޑިމޮކްރެޓްސް އިން ވަކިވެ، އެމްޑީޕީއަށް ސޮއި ކުރެއްވުމުންނެވެ.
ދާދިފަހުން ޑިމޮކްރެޓްސްގެ ސީނިއަރ ބޭފުޅުންކޮޅެއް ވަނީ އެ ޕާޓީ ދޫކުރައްވައި، އެމްޑީޕީއާއި ގުޅިވަޑައިގެންފައެވެ. އޭގެތެރޭގައި ހަސަން ލަތީފާއި ޝިފާޒްގެ އިތުރުން، ނިމިދިޔަ ރިޔާސީ އިންތިޚާބުގައި އެ ޕާޓީގެ ރިޔާސީ ކެންޑިޑޭޓްގެ ރަނިންމޭޓުގެ ގޮތުގައި ހުންނެވި ހުސެއިން އަމްރު އާއި މެދުހެންވޭރު ދާއިރާގެ ކުރީގެ މެމްބަރު އަލީ އާޒިމްވެސް ހިމެނެއެވެ.
