ޕީޕީއެމް/ޕީއެންސީގެ މެދުހެންވޭރު ދާއިރާގެ މަޖިލިސް ޕްރައިމަރީ ބާތިލު ކުރަން ހުށަހެޅިތާ 11 މަސް ވެފައި ވަނިކޮށް، މައްސަލަ ސާބިތު ނުވާކަމަށް ސިވިލް ކޯޓުން މިއަދު ހުކުމް ކޮށްފިއެވެ.

ޕްރައިމަތީ ބާތިލު ކުރަން ކޯޓަށް ހުށަހެޅީ އެ ޕްރައިމަރީގައި ވާދަ ކުރި ހ. ފޭވަރިޓް ވިލާ ހަސަން ރަމީޒެވެ.

ރަމީޒު ހުށަހެޅި މައްސަލައިގައި ބުނެފައި ވަނީ، ޕީޕީއެމް،ޕީއެންސީ ކޯލިޝަނުން މިދިޔަ 2024 ވަނަ އަހަރުގެ ޖެނުއަރީ މަހުުގެ 27 ވަނަ ދުވަހު ބޭއްވި އެ ކޯލީޝަންގެ މަޖިލިސް ޕްރައިމަރީގައި، އޭނާގެ ހައްގު ގެއްލޭގޮތަށް ކަންކަން އިންތިޒާމް ކޮށްފައިވާ ކަމަށެވެ.

އެގޮތުން އެ ޕްރައިމަރީގައި ވޯޓު ލުމުގެ ހައްގު ގެއްލޭ ގޮތަށް ވޯޓުލާ މީހުންގެ ލިސްޓަށް އުނި އިތުރު ގެނެސްފައިވާ ކަމަށާއި، ވޯޓު ގުނުމުގެ މަސައްކަތް ނުފެށެނީސް ވޯޓުލާ މަރުކަޒަށް މީހަކު ވަދެ، ހަމަނުޖެހުން ހިންގައި ވޯޓު ކަރުދާސްތައް ޖަހައިގަނެގެން އިންތިހާބީ މަރުކަޒުން ނުކުތް ކަމަށްވެސް ބުނެފައިވެއެވެ.

އެހެން ކަމުން އެދާއިރާގެ ނަތީޖާ އިއުލާން ކުރީ ވޯޓު ކަރުދާސް ތަކަށް ވީނުވީއެއް ނޭނގި އޮޅުން ބޮޅުން ތެރޭގައި ވަނިކޮށް ކަމަށްވެސް ބުނެފައިވެއެވެ.

ރަމީޒް ބުނެފައި ވަނީ އެކަން ކޮށްފައި ވަނީ، އިންތިޚާބު ތަކުގައި އަމަލުކުރާ އަދި ކޯލިޝަންގައި ހިމެނޭ ސިޔާސީ ދެ ޕާޓީގެ އަސާސީ ގަވާއިދު ތަކާއި އުސޫލުތަކާއި މުޅި ޑިމޮކްރެޓިކް ނިޒާމާ ހިލާފަށް ކަމަށެވެ.

އެހެން ކަމުން ރަމީޒް ކޯޓުގައި އެދިފައި ވަނީ، އެ ޕްރައިމަރީ ބާތިލް ކަމަށް ކަނޑަަޅައި ދިނުމަށާއި، ޕާޓީ މެންބަރުންނާއި ކެންޑިޑޭޓުންގެ ހައްގުތައް ނުގެއްލޭ ގޮތަށް ޕްރައިމަރީ އަލުން ބާއްވައި ދިނުމަށް ޕީޕީއެމް އާއި ޕީއެންސީގެ މައްޗަށް އަމުރު ކޮށްދިނުމަށެވެ.

މީގެއިތުރުން މި ދައުވާގައި ބުނާ ގޮތަށް ޕްރައިމަރީ ބާތިލް ކަމަށް ކަނޑައަޅާ ހާލަތުގައި، މި ކަމާއި ގުޅިގެން ރަމީޒަށް އެއްވެސް ގެއްލުމެއް ލިބިފައިވާ ކަމަށް ދެކޭނަމަ، ކޯޓު މެދުވެރިކޮށް އެކަމުގެ ބަދަލު ހޯދުމުގެ ހައްގު އޭނާއަށް ލިބިގެންވާ ކަމަށް ކަނޑައަޅައި ދިނުމަށްވެސް އެދިފައިވެއެވެ.

މިދިޔަ 2024 ވަނަ އަހަރުގެ ފެބްރުއަރީ މަހުގެ 13 ވަނަ ދުވަހު ހުށަހެޅި މި މައްސަލައަށް ސިވިލް ކޯޓުން މިއަދު އިއްވި ހުކުމުގައި ވަނީ، ރަމީޒްގެ ފަރާތުން ޕީޕީއެމް/ޕީއެންސީގެ މައްޗަށް ކޮށްފައިވާ މި ދައުވާ ސާބިތު ނުވާކަމަށެވެ.