ސަރުކާރު ހިންގާ ޕާޓީ (ޕީއެންސީ) ގެ މެމްބަރުން އިތުރު ކުރުމަށް ފޯމު ފުރުމުގެ މަސައްކަތަށް ސަރުކާރުގެ އޮފީސްތައް ދިނުމަކީ ގާނޫނީ ގޮތުން މައްސަލައެއް ނޫން ކަމަށްވަންޏާ، އެމްޑީޕީގެ ފޯމު ފުރުމުގެ މަސައްކަތަށްވެސް ސަރުކާރު އޮފީސްތައް ބޭނުން ކުރުމުގެ ފުރުސަތު ސަރުކާރުން މަގު ފަހިކޮށްދޭން ޖެހޭނެ ކަމުގައި ކުރީގެ ޑިފެންސް މިނިސްޓަރު މާރިޔާ ދީދީ ވިދާޅުވެއްޖެއެވެ.

ޕީއެންސީގެ ފޯމު ފުރަން ސަރުކާރު އޮފީސްތައް ދިން މައްސަލައިގައި މާރިޔާ ވިދާޅުވީ، ޤާނޫނު އަސާސީގެ 17 ވަނަ މާއްދާއިން ހަމަހަމަކަން ކަށަވަރުކޮށްދޭ ކަމަށެވެ. މާރިޔާ މިފަދައިން ވިދާޅުވީ، ޕީއެންސީގެ ފޯމުތައް ފުރީ އައިޑީކާޑު ސެންޓަރުގެ ތެރޭގައި ކަމަށާއި، އެކަން ކުރިއަށް ދިޔައީ ހޯމް މިނިސްޓަރު އަލީ އިހްސާން އިސްވެ ހުންނަވައި ކަމަށް، އެ މިނިސްޓްރީގެ ސްޓޭޓް މިނިސްޓަރު އަބްދުލްމަޖީދު އިބްރާހީމް ވިދާޅުވި ވާހަކައަށް ރައްދު ދެއްވައި، ފާޑު ވިދާޅުވެއެވެ.

މީގެއިތުރުން، އެމްޑީޕީން މިމަހުގެ 31 ވަނަ ދުވަހު ބާއްވާ ހަރަކާތުގެ މައުލޫމާތު އާންމުންނާ ޙިއްސާކޮށް، އެކަން ޕްރޮމޯޓު ކުރުން އެމްޕީއެލް ސަރަހައްދަށް ނުދެވޭނެ ކަމަށާއި، އެ ސަރަހައްދުގައި ސިޔާސީ އެއްވެސް ހަރަކާތެއް ހިންގުމަކީ މަނާ ކަމެއް ކަމަށް ސަރުކާރުން އަންގާފައިވާތީ އެކަމަށް ފާޑުވިދާޅުވެ، މާރިޔާ ވިދާޅުވީ އެމްޕީއެލް ސަރަހައްދުގައި ސިޔާސީ ކަމެއް ނުބޭއްވޭއިރު، ސަރުކާރުގެ އޮފީސް ތަކުގައި ޕާޓީއަށް މީހުން ވައްދަން ފޯމު ފުރުމުގެ ކަންކަން ކުރިޔަށް ގެންދިޔުން ހުއްދަ ކަމަކަށް ހަދައިފި ކަމަށެވެ.

ޕީއެންސީއަށް ފޯމު ފުރީ އައިޑީކާޑު ސެންޓަރުގެ ތެރޭގައި ކަމަށް ބުނެ، ދައުރު ވަމުން އަންނަ ފޮޓޯ ތަކުގެ މައްސަލައިގައި ހޯމްލޭންޑް މިނިސްޓްރީންވެސް ވަނީ އެކަމަށް އިއުތިރާފު ވެފައެވެ. އެ މިނިސްޓްރީގެ ސްޓޭޓް މިނިސްޓަރު މަޖީދު ވިދާޅުވީ، އެ މީޓިންގ ރޫމަކީ ޑީއެންއާރުގެ މަސައްކަތާ ވަކިން އިންނަ މީޓިންގ ރޫމެއް ކަމަށެވެ. އަދި އެއީ އެ މިނިސްޓްރީގެ އެހެން ޑިޕާޓްމަންޓް ތަކުންވެސް ރިކްއެސްޓް ކުރުމުން ދޫކުރާ މީޓިންގ ރޫމެއް ކަމަށެވެ.