ދިވެހިންނަކީ މުޒާހަރާކޮށް، މަގުމަތިން ސަރުކާރު ބަދަލު ކުރުމުގެ ތާރީޚެއް އޮތް ބަޔެއް ކަމަށާއި، ރައީސް ޑރ. މުޙަންމަދު މުއިއްޒުގެ ސަރުކާރުވެސް ދިވެހިން ނުކުމެ މަގުމަތިން ބަދަލު ނުކުރާނެ ކަމަށް ހީފުޅުނުކުރެއްވުމަށް އުމަރު ނަސީރު ވިދާޅުވި ވާހަކަފުޅަށް، ނައިބު ރައީސް ޙުސައިން މުޙަންމަދު ލަތީފު ރައްދު ދެއްވައި ފާޑު ވިދާޅުވެއްޖެއެވެ.
ޗެނަލް ތޭރައިގެ ޕްރޮގްރާމެއްގައި އުމަރު ވިދާޅުވީ މަގުމަތިން ސަރުކާރު ބަދަލުކުރުމަކީ ހަމައެކަނި ބަންގްލަދޭޝްގައި ކުރާ ކަމެއްނޫން ކަމަށާއި ދިވެހިން މާކުރިން އެކަން ކޮށްއުޅޭ ކަމަށެވެ. އަދި ރައީސް މުއިއްޒުގެ ވެރިކަން މަގުމަތިން ބަދަލުކުރާ ހިސާބަށް ތިރިވެއްޖެނަމަ، ސަރުކާރު ބަދަލުކުރަން އުމަރުވެސް މަގުމައްޗަށް ނުކުމެވަޑައިގަންނަވާނެ ކަމަށް ވިދާޅުވިއެވެ.
މި ވާހަކަތަކަށް ރައްދު ދެއްވައި ނައިބު ރައީސް ޙުސެއިން ވިދާޅުވީ، ރައީސް ޑރ. މުއިއްޒަކީ އަބަދުވެސް ބިނާކުރަނިވި ފާޑުކިޔުމަށް ޖާގަދެއްވާ ބޭފުޅެއް ކަމަށެވެ. އަދި އެއީ ގައުމަށާއި ރައްޔިތުންނަށް ޚިދުމަތް ކޮށްދެއްވަން ނުކުމެވަޑަންނަވާ ކޮންމެ ވެރިއެއް ނުވަތަ ސިޔާސީ ބޭފުޅެއްގެ ކިބައިގައިވެސް ހުންނަންވާނެ ސިފައެެއް ކަމަށެވެ.
އުމަރުގެ ވާހަކަތައް ނައިބު ރައީސް ސިފަކުރެއްވީ ނާތަހުޒީބު، ޑިމޮކްރަސީއާއި ދުރު އަދި ރައްޔިތުންނަށް ހަޖޫ ޖެހުން ކަމަށެވެ.
"ފާޑުކިޔުމުގެ ނަމުގައި ދިވެހިރައްޔިތުންނަކީ ނާތަހުޒީބު، ޑިމޮކްރެސީއާއި ދުރުބައެއް ކަމަށްބުނެ، ރައްޔިތުންނަށް ހަޖޫޖެހުމަކީ ދަށުދަރައިޖެ އަމަލެއް." އުމަރަށް ރައްދު ދެއްވައި ނައިބު ރައީސް އެކްސްގައި ވިދާޅުވިއެވެ.
