އެމްޑީޕީގެ ޓީމުތަކުން މިހާރު "ދޮރުން ދޮރަށް" ހިނގަމުންދާއިރު، ކޮންމެ ގެޔަކުންވެސް ބައްދަލުވާ ކޮންމެ މީހަކުވެސް ބުނަމުންދާ ވާހަކައަކީ "ފުދިއްޖެޔޭ، ފުނޑިއްޖެޔޭ" ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މާލޭގެ ބަޔެއް ގެތަކާއި ހުޅުމާލޭގެ ބަޔެއް ގެތަކުގައި އުޅޭ މީހުންނާ ބައްދަލު ކުރުމަށް ހިންގި ދޮރުން ދޮރަށް ކެމްޕޭނަށްފަހު ޝާހިދު އެކްސްގައި ތަކުރާރުކޮށް ވިދާޅުވެފައި ވަނީ "ކޮންމެ ބޭފުޅަކުވެސް ވިދާޅުވަނީ "ފުދިއްޖެޔޭ، ފުނޑިއްޖެޔޭ" ކަމަށެވެ.
ޝާހިދު ވިދާޅުވީ، ގޭގެއަށް ދިޔުމުން ރައްޔިތުން ބުނަމުން ދަނީ، ސަރުކާރާއި ރައްޔިތުންގެ މަޖިލިސް ދީގެންވެސް ރައްޔިތުން އެދޭފަދަ ވެރިކަމެއް މިހާރުގެ ސަރުކާރަށް ކޮށްނުދެވުނު ކަމަށެވެ. އެހެންވެ އަމިއްލަ ޖީބު ބަރު ކުރަމުން ދޮގާއި އޮޅުވާލުމުގެ ފަލްސަފާއަށް ޖާގަ ދީގެން ތިބެގެން ވާން ނެތް ކަމަށް ބުނަމުންދާ ކަމަށެވެ.
މާލެ އާއި ހުޅުމާލޭގެ ބަޔެއް ގެތަކަށް ކުރެއްވި ޒިޔާރަތަށްފަހު ޝާހިދު އެދިވަޑައިގަތީ މިމަހުގެ 31 ވަނަ ދުވަހު ހަވީރު ހަތަރެއް ޖަހާއިރު އާޓިފިޝިއަލް ބީޗުގައި އެމްޑީޕީން ބާއްވާ އެއްވުމަށް ވީހާވެސްގިނަ މީހުން ދިޔުމަށެވެ.
"ރައްޔިތުންގެ ހައްގުގައި އެންމެ ކުރީގައި އަބަދުވެސް އެމްޑީޕީ އޮންނާނެ، ރައްޔިތުންގެ އަޑު ސަރުކާރަށް އިއްވަން ވަޑައިގަންނަވާ" ޝާހިދު ވިދާޅުވިއެވެ.
