އުމްރާއަށް މީހުން ގެންދިއުމުގެ އުސޫލާ ޚިލާފުވެގެން 19 ކުންފުންޏަކަށް ފިޔަވަޅު އަޅައިފިއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވީ، އުސޫލާ ޚިލާފުވެފައިވާ ކުޑަބޮޑު މިންވަރަށް ނުބަލައި، އެ ކުންފުނިތައް 5،000 ރުފިޔާއިން ޖޫރިމަނާ ކޮށްފައިވާ ކަމަށެވެ.
އުމްރާއަށް މީހުން ގެންދިއުމަށް އެ މިނިސްޓްރީ އިން ދީފައިވާ ރަސްމީ ލައިސަން ދައްކައިގެން މީހުން ގޮވައިގެން އުމްރާއަށް ފުރަން ކަމަށް ހަދައި، އެމްއެމްއޭ އިން ޑޮަލަރު ނަގައި، އުމްރާއަށް ނުދިޔަ ކުންފުންޏެއް ފާހަގަ ކުރެވިފައިވާ ކަމަށްވެސް މިނިސްޓަރު ވިދާޅުވިއެވެ.
އެހެންކަމުން އެ މައްސަލަ އިތުރަށް ބަލައި މިނިސްޓްރީއަށް އެކަން ސާބިތު ވެއްޖެނަމަ، އެކުންފުނި 30،000 ރުފިޔާއިން ޖޫރިމަނާކޮށް ހުއްދަ ހިފަހައްޓައި، މައްސަލަ ތަހްގީގު ކުރަން ޕޮލިހަށް ފޮނުވާނެ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، އެ މައްސަލަ ޕޮލިހަށް ފޮނުވާނީ، ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްސް ހުށަހެޅުމުންކަމުގައި ވެފައި، ފޭކު ޑޮކިއުމެންޓް ހުށަހެޅި ކަމަށް ތުހުމަތު ކުރެވޭތީ ކަމަށެވެ.
އުމްރާއަށް މީހުން ގެންދިއުމުގައި އަމަލު ކުރުމަށް ގެޒެޓް ކޮށްފައިވާ އުސޫލަށް އަމަލު ނުކުރާ ހުރިހާ ކުންފުނިތަކަށް ފިޔަވަޅު އަޅާނެ ކަމަށްވެސް މިނިސްޓަރު ވިދާޅުވިއެވެ.
މީގެކުރިންވެސް އުމްރާއަށް ގެންދިއުމުގެ އުސޫލާ ހިލާފްވެގެން ބައެއް ކުންުފުނިތަކަށް ވަނީ ފިޔަވަޅު އަޅައިފައެވެ.
