ކުރިއަށް އޮތް ދުވަސްތަކުގައި ރާއްޖެއަށް މޫސުން ގޯސްވާނެ ކަމަށް ލަފާކޮށްފައި ވާތީ، ރައްޔިތުންނަށް ލިބިދާނެ ގެއްލުންތަކުން ރައްކާތެރިވުމުގެ ފިޔަވަޅުތައް އެޅުމަށް ސިފައިންނާއި ކަމާބެހޭ އިދާރާތައް ގުޅިގެން މިއަދު ޖޮއިންޓް އޮޕަރޭޝަނެއް ފަށައި، ޖޮއިންޓް އޮޕަރޭޝަން ސެންޓަރ ވަނީ ގާއިމް ކޮށްފިއެވެ.
މި ސެންޓަރު މަސައްކަތް ކުރާނީ ސިފައިންގެ އިތުރުން މިކަމާގުޅޭ ހުރިހާ އިދާރާތައް ގުޅިގެން އެކުއެކީގައެވެ. މިފަދަ ސެންޓަރެއް ގާއިމް ކުރިއިރު، މިއަދުން ފެށިގެން ކުރިއަށް އޮތް ހަ ދުވަސް ވަންދެން ރާއްޖޭގެ މޫސުން ގޯސްވާނެ ކަމަށް މޫސުމާބެހޭ ގައުމީ އިދާރާ (މެޓް) އިން ވަނީ ލަފާ ކޮށްފައެވެ.
އަވައްޓެރި އިންޑިޔާގެ ބޭ އޮފް ބެންގާލު ސަރަހައްދުގައި އުފެދިފައިވާ ކޮޅިގަނޑު ރާއްޖެއަށް އަރައި، ރާއްޖޭގެ ހުރިހާ ހިސާބަކަށްވެސް ކުރިއަށް އޮތް ހަ ދުވަސް ވެގެންދާނީ، ބޯކޮށް ވާރޭވެހި، ވައި ގަދަވެ، ކަނޑުވެސް ގަދަވާނެ ދުވަސް ތަކެއް ކަމަށް ވަނީ ލަފާ ކޮށްފައެވެ.
