މާދަމާއިން ފެށިގެން އަނެއްކާވެސް މޫސުން ގޯސްވާނެ ކަމަށް މޫސުމާބެހޭ ގައުމީ އިދާރާއިން ބުނެފިއެވެ.
މެޓު އޮފީހުން ބުނީ މާދަމާއިން ފެށިގެން ރާއްޖޭގެ ބޮޑު ބަޔަކަށް މޫސުން ގޯސްވާނެ ކަމަށް ލަފާ ކުރެވޭ ކަމަށެވެ. ސަބަބަކީ ބޭ އޮފް ބެންގާލް ސަރަހައްދުގައި ވަރުގަދަ ކޮޅިގަނޑެއް އުފެދިފައިވުން ކަމަށާއި، އެ ކޮޅިގަނޑު ހުޅަނގަށް ޖެހި އެ ކޮޅިގަނޑުގެ އަސަރު ރާއްޖެއަށް ކުރާނެ ކަމަށް ލަފާ ކުރެވޭ ކަމަށް ވަނީ ބުނެފައެވެ.
މެޓުން ބުނީ، މިފަހަރު މޫސުން ގޯސްވެ ވިއްސާރަވެސް ހަ ދުވަހަށް ދިގު ދެމިގެންދާނެ ކަމަށެވެ. ރާއްޖޭގެ ބަޔެއް ރަށްތަކަށް ބޯކޮށް ވާރޭވެހޭނެ ކަމަށްވެސް މެޓުން ބުނެފައިވެއެވެ. މެޓުން ލަފާ ކުރަނީ މިފަހަރުގެ ކޮޅިގަނޑުގައިވެސް ރާއްޖޭގެ ކަނޑުތައް ވަރަށް ގަދަވާނެ ކަމަށެވެ. އަދި އުތުރާއި މެދުރާއްޖެ ތެރޭގެ ބައެއް ރަށްތަކަށް އުދައިގެ އަސަރު ކުރާނެ ކަމަށްވެސް ލަފާ ކުރެވެއެވެ.
ހުސްވި ހަފްތާގައިވެސް މޫސުން ގޯސްވެ ރާއްޖެއަށް ވެހުނު ބޯ ވިއްސާރައިގައި ގިނަ ރަށްރަށުގައި ފެން ބޮޑުވެ ގިނަ ގެއްލުންތަކެއް ވަނީ ވެފައެވެ.
