ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަކީ ދިވެހި ރާއްޖެއަށް އުންމީދު ގެނެސްދޭ ޕާޓީ ކަމުގައި، އެ ޕާޓީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.
ކުރިން އެމްޑީޕީގެ އިސް ސަފުގައި އުޅުއްވުމަށްފަހު، ނިމިދިޔަ ރިޔާސީ އިންތިޚާބުގެ ދުވަސްވަރު އެމްޑީޕީ އިން ވަކިވެ، ދަ ޑިމޮކްރެޓްސް ޕާޓީ އުފައްދައި، އެ ޕާޓީއަށް ވަޑައިގެންނެވި ހަސަން ލަތީފާއި ހުސައިން އަމްރު އަދި މުހަންމަދު ޝިފާޒްގެ އިތުރުން އަލީ އާޒިމް، ޑިމޮކްރެޓްސް އިން ވަކިވެ އެނބުރި އެމްޑީޕީއަށް ސޮއި ކުރެއްވުމުން އެ ބޭފުޅުންނަށް މަރުޙަބާ ވިދާޅުވެ ޝާހިދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އެ ހުރިހާ ބޭފުޅުންނަށްވެސް މަރުޙަބާ ވިދާޅުވާ ކަމަށާއި، އެމްޑީޕީއަކީ ރާއްޖެއަށް ހެޔޮ ބަދަލު ގެނެސްދޭ ފަޚުރުވެރި ޕާޓީ ކަމަށެވެ.
"މިޕާޓީއަކީ ދިވެހިރާއްޖެއަށް އުއްމީދާއި ހެޔޮ ބަދަލު ގެނެސްދޭ ފަޚުރުވެރި ޕާޓީ" ޝާހިދު ވިދާޅުވިއެވެ.
ޝާހިދު ވިދާޅުވީ، އެދިވަޑައިގަންނަވަނީ ވީހާވެސް ގިނަބަޔަކު އެމްޑީޕީއާއި ގުޅުމަށް ކަމަށެވެ. އެމްޑީޕީއާއި ގުޅެންވީ ޑިމޮކްރަސީ ހަރުދަނާކޮށް، ރައްޔިތުންގެ ބާރުވެރިކަން އިތުރު ކުރުމަށް އެމްޑީޕީ އިން ކުރަމުން ގެންދާ މަސައްކަތްތަކުގައި ބައިވެރިވުމަށް ކަމަށްވެސް ޝާހިދު ވިދާޅުވިއެވެ.
ޑިމޮކްރެޓްސްގެ ރައީސް ހަސަން ލަތީފާއި އެ ޕާޓީގެ ނައިބު ރައީސް މުހަންމަދު ޝިފާޒްގެ އިތުރުން ނިމިދިޔަ ރިޔާސީ އިންތިޚާބުގައި ޑިމޮކްރެޓްސްގެ ރަނިންމޭޓް ހުސައިން އަމްރުގެ އިތުރުން އަލީ އާޒިމް އެމްޑީޕީއާއި ގުޅިވަޑައިގެންނެވިއިރު، ޑިމޮކްރެޓްސްގެ އިތުރު މެމްބަރުންތަކެއްވެސް އެމްޑީޕީއާއި ގުޅުމަށް ނިންމާފައިވާ ކަމުގެ މައުލޫމާތުވެސް ލިބިފައިވެއެވެ.
