ދަ ޑިމޮކްރެޓްސްގެ ރައީސް ކަމުން ޙަސަން ލަތީފް މިއަދު އިސްތިއުފާ ދެއްވައިފިއެވެ.
ޑިމޮކްރެޓްސްގެ ނައިބު ރައީސް މުޙަންމަދު ޝިފާޒަށް އެޑްރެސްކޮށް، ހަސަން ލަތީފު މިއަދު ފޮނުއްވި އިސްތިއުފާގެ ސިޓީގައި އިސްތިއުފާ ދެއްވާ ސަބަބެއް ނެތެވެ. އިސްތިއުފާގެ ސިޓީ ފޮނުވާފައި ވަނީ އިއްޔެގެ ވަގުތެއްގައެވެ.
މައުލޫމާތު ލިބިފައިވާ ގޮތުގައި ހަސަން ލަތީފު އިސްތިއުފާ ދެއްވީ، އެނބުރި އެމްޑީޕީއަށް ވަޑައިގަތުމަށެވެ. އެގޮތުން ހަސަން ވަރަށް އަވަހަށް އެމްޑީޕީއަށް ސޮއި ކުރާނެ ކަމުގެ މައުލޫމާތުވެސް ލިބިފައިވެއެވެ. ނަމަވެސް މިކަމާބެހޭ ގޮތުން ދެ ޕާޓީންކުރެ އެއްވެސް ޕާޓީއަކުން އަދި ހަސަން ލަތީފުވެސް ވަކިއެއްޗެއް ވިދާޅެއްނުވެއެވެ.
ހަސަން ލަތީފު ޑިމޮކްރެޓްސްގެ ރައީސް ކަމުން އިސްތިއުފާ ދެއްވިއިރު، އެ ޕާޓީގެ ނައިބު ރައީސް މުޙަންމަދު ޝިފާޒާއި، އަލީ އާޒިމްގެ އިތުރުން ހުސައިން އަމްރު ވަނީ އެމްޑީޕީއަށް އެނބުރި ސޮއި ކުރައްވާފައެވެ.
