ދައުރުން ބޭރުން ރައްޔިތުންގެ މަޖިލީހުގެ ޖަލްސާއެއް އަންނަ ހަފްތާ ބާއްވަން ނިންމައިފިއެވެ.

މަޖިލީހުގެ ސުޕަރ މެޖޯރިޓީއޮތް ސަރުކާރު ހިންގާ ޕީއެންސީގެ މެންބަރަކު ވިދާޅުވީ، މި ޖަލްސާއަކީ އިލެކްޝަންސް ކޮމިޝަން (އީސީ) އަށް މެންބަރުން ހަމަކުރުމަށްޓަކައި އެ ކޮމިޝަންގެ ހުސްވެފައިވާ މެންބަރުކަމަށް އައްޔަން ކުރުމަށްޓަކައި މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ފޮނުއްވާފައިވާ ނަންތަކާ ބެހޭގޮތުން ގޮތެއް ނިންމަން ބާއްވާ ޖަލްސާއެއް ކަމަށެވެ.

އެކަމަށްޓަކައި ދައުރުން ބޭރުން ބާއްވާ ފުރަތަމަ ޖަލްސާ އޮންނާނީ މިމަހު 16 ވާ ބުރާސްފަތި ދުވަހު ކަމަށްވެސް މެންބަރު ވިދާޅުވިއެވެ.

އީސީގައި ހިމެނޭ 5 މެންބަރުންގެ ތެރެއިން ދެ މެންބަރުންގެ މަގާމު ހުސްވީ، މިދިޔަ ނޮވެމްބަރު މަހުގެ 25 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާއިން ފާސްކޮށް، އެ ކޮމިޝަންގެ އޭރުގެ ނާއިބު ރައީސް، އަލީ ނަޝާތާއި، މެންބަރު މުހައްމަދު އާސިފް ކޮމިޝަންގެ މެންބަރުކަމުން ވަކި ކުރުމާ ގުޅިގެންނެވެ.

އެ ދެ ބޭފުޅުންގެ ބަދަލުގައި، އީސީގެ މެންބަރު ކަމަށް އައްޔަން ކުރުމަށް މަޖިލީހުގެ ރުހުން ހޯއްދެވުމަށްޓަކައި ދެ ބޭފުޅެއްގެ ނަން ރައީސް މުއިއްޒު ވަނީ މަޖިލީހަށް ފޮނުއްވައިފައެވެ.

މަޖިލީހުން ރުހުން ދެއްވުމަށް އެދިވަޑައިގެންނެވި ދެ ބޭފުޅުން:

މުހައްމަދު ޒާހިދު ދަފްތަރު ނަމްބަރު ރސ. 1548

އަބްދުއްރަހްމާން ސަލާހް ރަޝީދު، ރޯޒް، ކ. ހުރާ

އެ ދެބެފުޅުންގެ ކުށުގެ ރެކޯޑް ބެލުމަށްފަހު، މަޖިލީހުގެ މިނިވަން މުއައްސަސާތަކުގެ ކޮމިޓީން މިހާރުވަނީ އެ ދެބޭފުޅުންނާ އިންޓަވިއުވެސް ކޮށްފައެވެ. ދެން އޮންނާނީ އެ ދެބޭފުޅުންނާމެދު ކޮމިޓީން ނިންމި ގޮތެއް މަޖިލިސް ތަޅުމަށް ހުށަހެޅުމެވެ.

އެގޮތުން ދައުރުން ބޭރުން މިމަހު 16 ގައި ބާއްވާ ޖަލްސާއަށް، އެ ދެބޭފުޅުންނާމެދު ކޮމިޓީން ނިންމި ގޮތުގެ ކޮމިޓީ ރިޕޯޓު މަޖިލިސް ތަޅުމަށް ހުށަހަޅާނެއެވެ.