2020 ވަނަ އަހަރުގެ އޮޑިޓް ރިޕޯޓާއި 2021 ވަނަ އަހަރުގެ އޮޑިޓް ރިޕޯޓުގެ އިތުރުން 2022 ވަނަ އަހަރުގެ އޮޑިޓް ރިޕޯޓުންވެސް ފޮރިން މިނިސްޓްރީ "އޭ" ފާސް ހޯދުމާއެކު، ފޮރިން މިނިސްޓްރީގައި އޭރު ތިއްބެވި ހުރިހާ މުވައްޒަފުންނަށް، އޭރުގެ ޚާރިޖީ ވަޒީރު އަބްދުﷲ ޝާހިދު ޝުކުރު އަދާ ކުރައްވައިފިއެވެ.

2022 ވަނަ އަހަރުގެ އޮޑިޓް ރިޕޯޓު، އޮޑިޓް އޮފީހުން ނެރުނުއިރުވެސް އެއްވެސް މައްސަލައެއް ނެތް މިނިސްޓްރީއެއްގެ ގޮތުގައި ފޮރިން މިނިސްޓްރީ އޮތުމުން، ސޯޝަލްމީޑިޔާގައި ޝާހިދު މިއަދު ވިދާޅުވީ، އެ ކާމިޔާބަކީ ފޮރިން މިނިސްޓްރީގެ އޭރުގެ ވެރިންނާއި މުވައްޒަފުންގެ ބުރަ މަސައްކަތް ކަމަށެވެ. އަދި ޕްރޮފެޝަނަލްކަމާއެކު މުވައްޒަފުން ކުރެއްވި މަސައްކަތް ކަމަށެވެ. އެހެންކަމުން ޝާހިދުގެ ހުރިހާވެސް ޝުކުރެއް އަދާކުރެއްވީ "ޓީމް ޚާރިޖިއްޔާ" އަށެވެ.

ހުސްވި ހަފްތާގައި އޮޑިޓް އޮފީހުން ނެރުނު 2022 ވަނަ އަހަރުގެ އޮޑިޓް ރިޕޯޓު ތަކުގެ ތެރެއިން، ފޮރިން މިނިސްޓްރީގެ އޮޑިޓް ރިޕޯޓުގައި އެއްވެސް މައްސަލައެއް ފާހަގަ ކޮށްފައި ނުވެއެވެ. ފޮރިން މިނިސްޓްރީގެ 2022 ވަނަ އަހަރުގެ އޮޑިޓް ރިޕޯޓަށް އޮޑިޓް އޮފީހުން ދީފައި އޮތްތަން ފެނުނީ ސަތޭކައަކުން ސަތޭކައެވެ.

2022 ވަނަ އަހަރުގެ އޮޑިޓް ރިޕޯޓުން ފޮރިން މިނިސްޓްރީއަކީ މާލީ ގޮތުން ސާފު ރެކޯޑެއް އޮތް ތަނެއްގެ ގޮތުގައި އޮޑިޓް އޮފީހުން ފާހަގަ ކޮށްފައިވާއިރު، 2020 ވަނަ އަހަރާއި 2021 ވަނަ އަހަރުވެސް ފޮރިން މިނިސްޓްރީ ވަނީ ހަމަ އެގޮތުގައި ހިފަހައްޓާފައެވެ. އެ ދެ އަހަރުވެސް އޮޑިޓް އޮފީހުން ނެރުނު ރިޕޯޓުގައި ފޮރިން މިނިސްޓްރީގެ މާލީ ހުރިހާ ކަމެއްވެސް ކުރިޔަށް ގެންގޮސްފައި ވަނީ ދައުލަތުގެ މާލީ އޮނިގަނޑުގެ ތެރެއިން ބަރާބަރަށެވެ.

ޖެހިޖެގެން ތިން އަހަރު ފޮރިން މިނިސްޓްރީގެ އޮޑިޓް ރިޕޯޓަށް ސަތޭކައަކުން ސަތޭކަ ލިބިގެން ދިޔައިރު އެ މިނިސްޓްރީގެ ވަޒީރެއްގެ ގޮތުގައި ހުންނެވީ މިހާރު އެމްޑީޕީގެ ރައީސްގެ ގޮތުގައި ހުންނެވި އަބްދުﷲ ޝާހިދެވެ.

ޝާހިދުގެ ވަޒީރު ކަމުގައި ފޮރިން މިނިސްޓްރީ ޖެހިޖެހިގެން ތިން އަހަރު އޮޑިޓް ރިޕޯޓުން "އޭ" ފާސް ހޯދައި، މިފަދަ ނަތީޖާއެއް ނެރުން ގިނަބަޔަކު ފާހަގަ ކުރަނީ ޝާހިދުގެ ހިންގުންތެރިކަމުގެ އިތުރުން، ދައުލަތުގެ ފައިސާއަށް އަމާނާތްތެރިކަމާއެކު މުވައްޒަފުން އަމަލު ކުރެއްވުމަށް ޝާހިދު ގެންގުޅުއްވި ހަރުދަނާ ސިޔާސަތާއި އެކަން ތަންފީޒު ކުރައްވަމުން ގެންގޮސްފައިވާ ކަމެވެ. ކޮރަޕްޝަނަށް ކުޑަވެސް ޖާގައެއް ނުދެއްވައި، ކަންކަން ގާތުން ބައްލަވަމުން ގެންދަވާފައިވާ ކަމުގެ މިސާލެއްގެ ގޮތުގައެވެ.

ފޮރިން މިނިސްޓްރީގައި ޝާހިދާއެކު އުޅުއްވި ސީނިއަރ މުވައްޒަފަކު ވިދާޅުވީ، ފައިސާގެ ކަންކަމުގައި ދައުލަތުގެ މާލީ އޮނިގަނޑުގައި އޮންނަ ގޮތަށް އަކުރުން އަކުރަށް ހުރިހާ ކަމެއްވެސް ގެންދަވަން ޝާހިދު އަބަދުވެސް އިސްކަން ދެއްވާ ކަމަށެވެ.

"ޝާހިދު ބޭނުންފުޅެއްނުވާނެ ކޮންމެ ކަމެއް ވަރިހަމަ ކަމަށް ދޫކުރައްވާކަށް. މާލީ ހިސާބުތައް ރަނގަޅު ކުރައްވަން އަބަދުވެސް އިސްކަން ދެއްވާނެ. އޮންނަ އުސޫލުގެ ތެރެއިން ނޫނީ ބައިރުފިޔާއެއްވެސް ޚަރަދު ކުރައްވަން ބޭނުންފުޅެއްނުވާނެ. މިސާލަކަށް ކޮންމެވެސް ކަމެއް އެއީ ކޮންމެހެން ކުރަންޖެހޭ ކަމަކަށް ވެދާނެ. ނުކޮށްފިއްޔާ ވަރަށްގިނަ މީހުންގެ ނުރުހުން އަންނަ ކަމަކަށްވެސް ވެދާނެ. އެކަމަކު ވިދާޅުވާނެ، ޚަރަދު ކުރަން އޮންނަ އުސޫލުގެ ތެރެއިން ނުވަންޏާ ނުކޮށްތިބުންވެސް މާ ރަނގަޅުވާނޭ. ކިރިޔާވެސް ގޯހެއް އޮތްތޯ ބައްލަވާނެ. ގޯހެއް އުޅޭހެން ހީވިޔަސް އެކަމެއް މަޑު ކުރައްވަން އަންގަވާނެ." އޭނާ ވިދާޅުވިއެވެ.

މާލީ ދާއިރާގައި ކުރިން އުޅުއްވި ބޭފުޅަކު ވިދާޅުވީ ފޮރިން މިނިސްޓްރީގެ އޮޑިޓް ރިޕޯޓުތަކުން ފެންނަ އެއްޗަކީ ކޮރަޕްޝަނަށް އެއްވެސް ޖާގައެއް ނުދެއްވައި ޝާހިދު، ދިވެހި ޚާރިޖިއްޔާ ހިންގެވި މަންޒަރު ކަމަށެވެ.

ރައީސް އިބްރާހީމް މުޙަންމަދު ސޯލިހުގެ ސަރުކާރުގައި މިނިސްޓްރީ ތަކުގެ އޮޑިޓް ރިޕޯޓުތައް ނުކުންނައިރު، އަބަދުވެސް ފޮރިން މިނިސްޓްރީ ފެނިގެން ޚަރަދުތައް ކުރުމުގައި ފަރުވާތެރި، އެއްވެސް މައްސަލައެއް ނެތް ތަނެއްގެ ގޮތުގައެވެ.