އަމިއްލަ ބޮންޑެޑް ވެއާހައުސްއެއްގައި ބަހައްޓާފައިހުރި 34،500 ސިނގިރޭޓް ކާޓަން ގެއްލުނު މައްސަލައިގައި އެ ތަކެތީގެ ވެރިފަރާތުން 40 މިލިއަން ރުފިޔާ ދައްކަން މޯލްޑިވްސް ކަސްޓަމްސްއިން އަންގައިފި އެވެ.

އެނގިފައިވާ ގޮތުގައި 40 މިލިއަން ރުފިޔާ ދެއްކުމަށް ކަސްޓަމުން އަންގައިފައިވަނީ މިދިޔަ ހަފުތާ ތެރޭގައެވެ.

ސިނގިރޭޓް ކާޓަންތައް ގެއްލުނު މައްސަލައާ ގުޅިގެން އެތަކެތީގެ ވެރި ފަރާތާ ދެކޮޅަށް އެފަދަ ފިޔަވަޅެއް އަޅާފައިވަނީ ކަސްޓަމްސްއަށް ނާންގައި ބޮންޑެޑް ވެއާހައުސްއިން އެއްޗެއް ނެރުމަކީ މަނާ ކަމަކަށް ވާތީވެއެވެ. އެހެންވެ ކަސްޓަމުން ވަނީ ޑިއުޓީ އަދި ޖޫރިމަނާއާއެކު 40 މިލިއަނެއްހާ ރުފިޔާ ދައްކަން ވެރިފަރާތަށް އަންގައިފަ އެވެ.

ކަސްޓަމްސްގެ ފަރާތުން ވަނީ ސިނގިރޭޓް ގެއްލުނު މައްސަލަ ފުލުހަށް ހުށަހަޅައި ކަސްޓަމްސްގެ ފުރިހަމަ ކޮންޓްރޯލް އޮންނަ ތަނެއްގައި ނޫނީ ބޮންޑެޑް ވެއާހައުސް ނުހެދޭ ގޮތަށް ހެދުމަށް ނިންމައިފައެވެ.

ބޮންޑެޑް ވެއާހައުސްތަކުގައި ދެ ތަޅެއް އަޅުވައެވެ. އޭގެތެރެއިން އެއް ތަޅުގެ ތަޅުދަނޑި އޮންނަނީ ކަސްޓަމްސްގައެވެ. އަނެއް ތަޅުގެ ތަޅުދަނޑި އޮންނަނީ މުދަލުގެ ވެރިފަރާތުގެ އަތުގައެވެ. ވެއާހައުސް ހުޅުވަން ޖެހެނީ ދެ ފަރާތުގެ ހާޒިރުގައެވެ.