އިދިކޮޅު ޕާޓީތަކުން އިންޑިޔާގެ އެހީތެރިކަން ހޯދައިގެން ރައީސް މުޙަންމަދު މުއިއްޒުގެ ސަރުކާރު ބަދަލު ކުރަން އުޅުނު ކަމަށް އެމެރިކާގެ މަޝްހޫރު ނޫހެއް ކަމަށްވާ ވޮޝިންޓަން ޕޯސްޓުން ބުނެފައިވާ ވާހަކަތައް ރާއްޖޭގެ ފޮރިން މިނިސްޓަރު އަބްދުﷲ ޚަލީލް ދޮގު ކުރައްވައިފިއެވެ.

ވޮޝިންޓަން ޕޯސްޓުގައި ގެނެސްފައިވާ ތަހުގީގީ ރިޕޯޓެއްގައި ބުނެފައި ވަނީ އިންޑިޔާގެ ޖާސޫސީ އިދާރާ، ރޯގެ އެހީގައި ރައީސް ޑރ. މުހައްމަދު މުއިއްޒުގެ ސަރުކާރު ބަދަލު ކުރަން އުޅުމުގައި އެންމެ އިސްކޮށް އޮތީ އެމްޑީޕީ އާއި ޑިމޮކްރެޓްސް ކަމަށެވެ. އެކަމަށް ފަންޑު ހޯދަން އޮތީ އިންޑިޔާއިން ކަމަށެވެ.

މިނިސްޓަރު ޚަލީލް އިންޑިޔާއަށް ކުރެއްވި ރަސްމީ ދަތުރުފުޅުގެ ތެރެއިން، އެ ގައުމުގެ "ވިއޯން" މީޑިޔާއަށް ދެއްވި އިންޓަވިއުއެއްގައި ވިދާޅުވީ، ވޮޝިންޓަން ޕޯސްޓުގައި ލިޔެފައި ވަނީ ކަނޑައެޅިގެން ހަގީގަތާ ޚިލާފު ދޮގު ވާހަކަތަކެއް ކަމަށެވެ. ޚަލީލު ވިދާޅުވީ، އެ ރިޕޯޓުގައި އެހުރީ ކޮންދިމާލަކުން ހޯދި ހެކިތަކެއް ކަމެއްވެސް ނޭނގޭ ކަމަށެވެ.

"އެއްވެސް ތެދެއް އޭގައި ނެތް." ޚަލީލު ވިދާޅުވިއެވެ.

ޚަލީލު ވިދާޅުވީ އެފަދަ ވާހަކަތައް ބަޔެއް ފަރާތްތަކުން ދައްކަމުން ދަނީ ރާއްޖެ އާއި އިންޑިޔާގެ ގުޅުން ރަނގަޅު ވަމުން އަންނާތީ އެކަމަށް ހުރަސް އެޅުމުގެ ނިޔަތުގައި ކަމަށެވެ. ނަމަވެސް އެފަދަ ޖާގައެއް އެ ފަރާތްތަކަށް ނުދެއްވާނެ ކަމަށްވެސް ޚަލީލު ވިދާޅުވިއެވެ. ވޮޝިންޓަން ޕޯސްޓުގައި ލިޔެފައިވާ ރިޕޯޓު ޚަލީލު ސިފަ ކުރެއްވީ ރާއްޖެ އާއި އިންޑިޔާގެ ގުޅުން ހީނަރު ކުރަން ގެނެސްދިން ރިޕޯޓެއްގެ ގޮތުގައެވެ. ޚަލީލު ތަކުރާރުކޮށް ވިދާޅުވީ އެ ރިޕޯޓުގައި އެއްވެސް ކަހަލަ ހަގީގަތެއް ނެތް ކަމަށެވެ.

ވޮޝިންޓަން ޕޯސްޓުގެ ރިޕޯޓުގައި ބުނެފައި ވަނީ ރައްޔިތުންގެ މަޖިލިސް ތެރެއިން ރައީސް މުއިއްޒުގެ އިތުބާރު ނެތް ކަމަށް ފާސްކުރަން އިދިކޮޅު ޕާޓީތަކުން 6 މިލިއަން ޑޮލަރު ޚަރަދު ކުރަން ނިންމާފައި އޮތް ކަމަށެވެ. އެ ފައިސާ ހޯދަން މަސައްކަތް ކުރީ އިންޑިޔާއިން ކަމަށެވެ.

ނަމަވެސް އެކަން ކާމިޔާބު ނުވީ ރައީސް މުއިއްޒުގެ އިތުބާރު ނެތް ކަމަށް ފާސްކުރަން އުޅޭކަމުގެ ޚަބަރު ރައީސް މުއިއްޒަށް ލިބިވަޑައިގެންނެވި ހިސާބުން، މަޖިލީހުގެ 13 މެމްބަރަކު ޕީއެންސީއަށް ގެންދިޔަ ހިސާބުން ކަމަށްވެސް ރިޕޯޓުގައި ބުނެފައިވެއެވެ. އަދި އެ މެމްބަރުން ގެންދިޔުމަށް ރައީސް މުއިއްޒު ދެ ލައްކަ ޑޮލަރު ޚަރަދު ކުރެއްވި ކަމަށްވެސް ބުނެފައިވެއެވެ.

ނަމަވެސް، ރިޕޯޓުގައިވާ ހުރިހާ ވާހަކަތަކެއް ފޮރިން މިނިސްޓަރު ޚަލީލު ވަނީ ދޮގު ކުރައްވާފައެވެ. އަދި މީގެކުރިން އެ ވާހަކަތައް އިންޑިޔާ ސަރުކާރުގެ އޮފިޝަލަކުވެސް ވަނީ ދޮގު ކުރައްވާފައެވެ.