ރާއްޖެއަށް މިހާރު ކުރަމުން އަންނަ ވިއްސާރައިގައި ރާއްޖޭގެ އެކިހިސާބު ތަކުގައި ދިރިއުޅޭ ރައްޔިތުންނަށް ލިބެމުން އަންނަ ގެއްލުންތަކުގައި، އެހީތެރިކަން ފޯރުކޮށް ދިނުމުގައި އެންމެންވެސް ބައިވެރިވުމަށް އެމްޑީޕީގެ ރައީސް އަބްދުﷲ ޝާހިދު އެދިވަޑައިގެންފިއެވެ.
ވިއްސާރައިގައި ގިނަބަޔަކަށް ގެއްލުންވަމުން އަންނަ މިދަނޑިވަޅުގައި ޝާހިދު ކުރެއްވި ޕޯސްޓެއްގައި ވިދާޅުވީ، ވިއްސާރައިގެ ސަބަބުން ރަށްތަކަށް ބޮޑެތި ގެއްލުންތަކެއް ލިބި، އާންމު ދިރިއުޅުން ގިނަ ރަށްރަށުގައި ހުއްޓުމަކަށް އައިސްފައިވާ ކަމަށާއި، ރައްޔިތުން ތަޙަންމަލު ކުރަމުންދާ ހިތާމައިގައި އެމަނިކުވެސް ބައިވެރިވެވަޑައިގަންނަވާ ކަމަށެވެ.
ޝާހިދު ވިދާޅުވީ، މިއީ އެންމެން ގުޅިގެން އެއްބައެއްގެ ގޮތުގައި އެހީތެރިކަން ފޯރުކޮށްދޭންވީ ވަގުތެއް ކަމަށެވެ.
"އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި ކައުންސިލު ތަކާއި، އެހެނިހެން އިދާރާތައް ގުޅިގެން ކުރެވޭ މަސައްކަތުގައި އެންމެން ބައިވެރިވެ، އެއްބައެއްގެ ގޮތުގައި އެހީތެރިވަމުން ގެންދިއުމަށް އަޅުގަނޑު އެދެމެވެ." ޝާހިދު ވިދާޅުވިއެވެ.
ރާއްޖޭގެ ހުރިހާ ހިސާބަކަށްވެސް ގަދަވަޔާއެކު ވެހެމުން އަންނަ ވިއްސާރައިގެ ސަބަބުން ގިނަ ރަށްރަށަށް އެންމެ ބޮޑެތި ގެއްލުން ވެފައިވަނީ އިއްޔެ އާއި ރޭގައެވެ. މެދުކެނޑުމެއް ނެތި އިއްޔެ އާއި ރޭ ވެހެމުންދިޔަ ބޯ ވާރޭގެ ސަބަބުން ވަރަށްގިނަ ގެތަކަށާއި ފިހާރަތަކާއި ކެފޭތައް ފަދަ ވިޔަފާރި ހިންގާ ތަންތަނަށް ފެންގަނޑު ވަދެ އެ ތަންތަނުގެ ޚިދުމަތް ވަނީ ކަނޑާލަން ޖެހިފައެވެ. އަދި މާލޭގެ މަގުތަކުގައި ބަރު އުޅަނދު ދުއްވުންވެސް ހުއްޓުމަކަށް އައެވެ.
އިއްޔެ އާއި ރޭ ބޯކޮށް ވާރޭ ވެހެމުން ދިޔަނަމަވެސް، މިއަދު ބަޔެއް ހިސާބުތަކަށް ކެރީގެ އަސަރު ނުކުރެއެވެ. ގިނަ ސަރަހައްދު ތަކަށް މިއަދު ވަނީ މޫސުން ކޮންމެވެސް ވަރަކަށް ރަނގަޅު ވެފައެވެ. ނަމަވެސް އިއްޔެ އާއި ރޭ ލިބުނު ގެއްލުންތަކުގެ ސަބަބުން އަދިވެސް ބަޔެއް ގޭގެ އާއި ފިހާތަކަކާއި ކެފޭ، ގުދަން ފަދަ ތަންތަނުގައި ހެނދުނު ފެންގަނޑުގެ އަސަރު މުޅިން ނުދެއެވެ.
