އިދިކޮޅު މައި ޕާޓީ ރާއްޖޭގެ ޓޫރިޒަމަށް ގެއްލުން ލިބިދާނެފަދަ ކަމެއް ނުކުރާނެ ކަމުގެ ޔަގީންކަން އެބައޮތް ކަމަށް ވެރިކަންކުރާ ޕީއެންސީން ބުނެފި އެވެ.
ޕީއެންސީން ރޭ ބޭއްވި ހަރުގެ ޖަލްސާގައި ނިހާދު ދެއްކެވި ވާހަކައިގައި، އެމްޑީޕީއިން މާލެ އަތޮޅުގެ ރިސޯޓުތަކުގައި ހިންގަން ރާވާފައިވާ އެއްވުންތަކާ ގުޅޭ ރިޕޯޓުތަކާ މެދު ސީރިއަސް ކަންބޮޑުވުންތައް ފާޅުކުރައްވާފައިވެއެވެ. އަދި މިފަދަ ޢަމަލުތަކަކީ ފަތުރުވެރިކަމުގެ ދާއިރާއަށާއި މުޅި އިގްތިސޯދަށް ސީދާ ޓެރަރިސްޓް ނުރައްކަލެއް ކަމުގައި ނިހާދު ސިފަކުރައްވާފައިވެއެވެ.
މިކަމާ ގުޅިގެން ޕީއެންސީން މިއަދު ނެރުނު ނޫސް ބަޔާނެއްގައި ބުނީ، ރާއްޖޭގެ އެއްވެސް ޒިންމާދާރު ސިޔާސީ ޕާޓީއަކުން ނުވަތަ މަދަނީ ޖަމިއްޔާއަކުން ފަތުރުވެރިކަމުގެ ސިނާޢަތަށް ބުރޫއަރާފަދަ ނުވަތަ ގައުމުގެ އިގްތިސޯދަށް ދާއިމީ ގެއްލުމެއް ލިބޭފަދަ ޙަރަކާތްތަކެއް ހިންގާނެ ކަމަށް އެ ޕާޓީން ގަބޫލު ނުކުރާ ކަމަށެވެ.
"މި ޕާޓީން ދެކޭ ގޮތުގައި ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން އަދި މަދަނީ ޖަމިއްޔާއަކުން ދިވެހިރާއްޖޭގެ ފަތުރުވެރި ކަމަށް އަދި ޖުމްލަކޮށް ދިވެހި އިގްތިސޯދަށް ފޫނުބެއްދޭވަރުގެ ގެއްލުމެއް ލިބިދާނެ ނުރައްކާތެރި އަމަލެއް ނުހިންގާނެއެވެ" ޕީއެންސީން ބުންޏެވެ.
"ހުރިހާ ފަރާތްތަކުންވެސް ގާނޫނުގެ ތެރެއިން އަމަލުކުރަންޖެހޭނެކަން އަޅުގަނޑުމެން ފާހަގަކުރަމެވެ. އަދި ގާނޫނީ އިމުން ބޭރުވާ އެއްވެސް އަމަލެއް ކަމާބެހޭ ފަރާތްތަކުން އެކަށީގެންވާ ފިޔަވަޅުތަކާ ކުރިމަތިލާންޖެހޭނެކަން ޔަޤީނެވެ.
ޕީއެންސީން އިތުރަށް ބުނީ، ރާއްޖެއަކީ ފަތުރުވެރިންނަށް ރައްކާތެރި، މަޑުމައިތިރި އަދި ސުލްހަވެރި މަންޒިލެއްގެ ގޮތުގައި ދެމެހެއްޓުމަށް ސަރުކާރުން ދެމިހުންނާނެކަން އަލުން ކަށަވަރުކޮށްދޭ ކަމަށެވެ. އަދި ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުގެ އިންވެސްޓްމަންޓްތައް ރައްކާތެރިކުރުމާއި، ދިވެހިރާއްޖެއަކީ ދުނިޔޭގެ ފެންވަރުގެ މަންޒިލެއްގެ ގޮތުގައި އޮތް ނަން ދެމެހެއްޓުމަކީ އެންމެ އިސް އަސްކަންދޭ ކަންތައްތަކުގެ ތެރޭގައި ހިމެނޭ ކަމެއް ކަމަށް ޕީއެންސީން ބުންޏެވެ.
ޕީއެންސީން އިލްތިމާސްކޮށްފައިވަނީ ހުރިހާ ފަރާތްތަކުންވެސް ޤައުމުގެ ސުލްޙައާއި، ސްޓެބިލިޓީއާއި އަދި އިޤްތިޞާދީ ކުރިއެރުމަށް ނުރައްކާވެދާނެ ފަދަ އެއްވެސް ޢަމަލެއް ނުކުރުމަށެވެ. އަދި ދިވެހިރާއްޖެއަކީ ފަތުރުވެރިކަމާއި އިންވެސްޓްމަންޓަށް ކުރިއަރާފައިވާ މަންޒިލެއްގެ ގޮތުގައި ދުނިޔޭގައި އޮތް ނަން ދަމަހައްޓައި، އިތުރަށް ކުރިއެރުވުމަށް އެންމެން ގުޅިގެން މަސައްކަތްކުރުމަށް ޕީއެންސީން ގޮވާލާފައިވެއެވެ.
އެގޮތުން ދިވެހިރާއްޖެއަކީ ޒިޔާރަތްކުރާ ފަރާތްތަކަށާއި އިންވެސްޓަރުންނަށް ރައްކާތެރި ތަނެއްގެ ގޮތުގައި ދެމެހެއްޓުމަށް ބުރަ މަސައްކަތްކުރާ ހުރިހާ ސަރުކާރުގެ މުއައްސަސާތަކަށާއި، ސިޔާސީ ޕާޓީތަކަށާއި، މަދަނީ ޖަމްޢިއްޔާތަކަށާއި އަދި އަމިއްލަ ފަރުދުންނަށް ޝުކުރު އަދާކުރާކަމަށް ޕީއެންސީން ބުންޏެވެ.
