އެޗްޑީސީގެ އެމްޑީގެ މަގާމުން އިބްރާހިމް ފަޒުލް ރަޝީދު އިސްތިއުފާދެއްވައިފި އެވެ.
އިސްތިއުފާ ދެއްވިކަން މިއަދު ފަޒުލް ވަނީ ރައީސް ޑރ. މުހައްމަދު މުއިއްޒަށް ސިޓީއަކަށް އަންގަވާފަ އެވެ.
އެ ސިޓީގައި ފަޒުލް ވަނީ އެޗްޑީސީގެ އެމްޑީގެ މަގާމުގައި ހޭދަކުރި މުއްދަތުގައި އެކި ގޮތްގޮތުންކޮށްފައިވާ އަދި މިހާރު އެކި އެކި ޕްލެޓްފޯމްތަކުގައި ކުރަމުންދާ ތުހުމަތުތަކަށް އިންކާރުކުރައްވާފަ އެވެ.
ފަޒުލް ވިދާޅުވީ އެ މަގާމަށް އައްޔަންކުރުމަށްފަހު ކުންފުނީގެ ފަރާތުން މިހާތަނަށް ކޮށްފައިވާ ހުރިހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ކުންފުނީގައި ހެދިފައިވާ ޕޮލިސީތަކުގެ އިމުގެ ތެރެއިން ކުންފުނީގެ މަސްލަހަތު އިސްކޮށްގެން ކޮށްފައިވާ މުއާމަލާތްތަކެއް ކަމަށެވެ.
ބިންވެރިޔާގެ ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫން ކަމަށް ފަޒުލް ވިދާޅުވި އެވެ. އަދި އެ ތުހުމަތުތަކުގެ ހަގީގަތް ވީ އެންމެ އަވަސް ފުރުސަތެއްގައި ރައްޔިތުންނަށް ހާމަކޮށްދިނުމަށް ފަޒުލް އެދިވަޑައިގެންނެވި އެވެ.
“މިކަމުގެ ސަބަބުން ކުންފުންޏާއި ސަރުކާރުގެ ސިޔާސަތުތައް ހުއްޓިފައި އޮންނާކަށް އަޅުގަނޑު ނޭދެން" ފަޒުލް ވިދާޅުވި އެވެ.
އެ މަގާމުން އިސްތިއުފާ ދެއްވީ ބިންވެރިޔާ ސްކީމްއާ ގުޅިގެން މިހާރު ކުރިއަށްދާ ތަހުގީގަށް ފުރުސަތު ދިނުމަށާއި ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމުގެ ފުރުސަތު ދިނުމުގެ ގޮތުން ކަމަށް އެ ސިޓީގައި ފަޒުލް ވިދާޅުވި އެވެ.
