އެމްޑީޕީގެ ސަރުކާރުގައި ބަދަލު ދިނުމަށް އަމިއްލަ އެކި ކުންފުނިތަކާ އެކު ސަރުކާރުން ސޮއިކޮށްފައިވާ 9 އެއްބަސްވުން ބާތިލް ކަމަށް ކަނޑައަޅައި އެ އެއްބަސްވުންތަކަށް އަމަލުނުކުރަން އެޓާނީ ޖެނެރަލް އަހުމަދު އުޝާމް މިއަދު އިދާރާތަކަށް އަންގަވައިފި އެވެ.
އަމިއްލަ ފަރާތްތަކުގެ އެކި ކުންފުނިތަކަށް ގެއްލުމުގެ ބަދަލުގެ ގޮތުގައި 1.6 ބިލިއަނަށް ވުރެ ގިނަ ރުފިޔާ ދޫކޮށްފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ. އެ ފައިސާތައް ދޫކޮށްފައިވަނީ ކުރީ ސަރުކާރުގަ އެވެ.
އޭޖީ އޮފީހުން މިރޭ ނެރުނު ނޫސްބަޔާނެއްގައި ބުނީ ބަދަލުދިނުމުގެ އެ އެއްބަސްވުންތަކަށް އަމަލުކުރަން ނުޖެހޭ ކަމަށް އޭޖީ ނިންމަވައި، ދައުލަތުގެ އިދާރާތަކަށް މިއަދު އެކަން އަންގަވާފައިވާ ކަމަށެވެ.
ބަދަލުދިނުމުގެ އެއްބަސްވުންތަކާ ގުޅޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާ ކުރުމަށްފަހު، އެ އެއްބަސްވުންތަކަކީ އުފެދުމުގައި ވެސް ބާތިލް އެއްބަސްވުންތަކެއް ކަމަށް މީގެ ކުރިން ވަނީ ނިންމައިފަ އެވެ.
އެ އެއްބަސްވުންތައް ބާތިލް ކުރުމަށާއި، އެ އުސޫލާއި އެއްބަސްވުންތަކުގެ ދަށުން އެއްވެސް ބަދަލެއް ދީފައިވާނަމަ، އެ ބަދަލެއް އަނބުރާ ހޯދުމަށް ވެސް ވަނީ ނިންމައިފަ އެވެ. މިކަމުގައި ހިމެނޭ ފަރާތްތަކުގެ މައްޗަށް އަޅަންޖެހޭ ފިޔަވަޅުތައް އެޅުމަށް އޭޖީއަށާއި ކަމާ ގުޅުންހުރި އިދާރާތަކަށް ދެންނެވުމަށް ފެންނަކަމަށް އެ ކޮމިޓީން ނިންމައި، އެ ފަރާތްތަކަށް ވަނީ އަންގައިފައެވެ.
މި މައްސަލަތައް އޭޖީ އޮފީހުން ދިރާސާކުރިއިރު، އެ އުސޫލަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި، ޤާނޫނާ ޚިލާފަށް އެކުލަވާލާފައިވާ އުސޫލެއްކަމާއި، އެ އުސޫލުގެ ދަށުން ނިންމާފައިވާ ނިންމުންތަކާއި ސޮއިކޮށްފައިވާ ސެޓްލްމަންޓް އެއްބަސްވުންތަކަކީ، ދައުލަތުގެ އޮޑިޓާ ޖެނެރަލްގެ ބަހެއް ނެތި، ވަކި ފަރާތްތަކަކަށް ނުޙައްޤު މުއްސަނދިކަމެއް ލިބޭގޮތަށް ނިންމާފައިވާ ނިންމުންތަކެއް ކަން ފާހަގަކުރެވިފައި ވާކަމަށް އެ އޮފީހުން ވަނީ ބުނެފައެވެ.
އެހެންކަމުން، އެ އުސޫލުގެ ދަށުން، ނިމިދިޔަ އެމްޑީޕީ ސަރުކާރުގައި ސޮއިކޮށްފައިވާ ނުވަ ސެޓްލްމަންޓް އެއްބަސްވުމަކީ، ބާތިލު އެއްބަސްވުންތަކެއް ކަމަށް އޭޖީ އޮފީހުން ވަނީ ނިންމާފައެވެ. އަދި އެއްބަސްވުންތަކަކީ ޢަމަލުކުރަންޖެހޭ އެއްބަސްވުންތަކެއް ނޫންކަން ކަމާބެހޭ ދައުލަތުގެ އިދާރާތަކަށް އެ އޮފީހުން އަންގާފައި ވާކަން ވެސް އޭޖީ އޮފީހުން ވަނީ ފާހަގަކޮށްފަ އެވެ.
