ގޯތި މައްސަލައިގައި ފުލުހުންނާއި އޭސީސީއަށް ޕީޖީ އައްބާސްގެ އަމުރެއް، އެންގެވީ ޖިނާއީ އަވަސް ތަހުހީގަކަށް

ގޯތި މައްސަލައިގައި ފުލުހުންނާއި އޭސީސީއަށް ޕީޖީ އައްބާސްގެ އަމުރެއް، އެންގެވީ ޖިނާއީ އަވަސް ތަހުހީގަކަށް

މިދިޔަ ސަރުކާރުން ކުރިޔަށް ގެންދިޔަ ބިންވެރިޔާ ސްކީމުގައި ބައިވެރިނުވާ ފަރާތްތަކަކަށް ހުޅުމާލެއިން ގޯތި ދިން މައްސަލައިގައި ޖިނާއީ ތަހުގީގެއް ހިންގަން ޕްރޮސިކިއުޓާ ޖެނެރަލް އައްބާސް ޝަރީފު އަންގަވައިފިއެވެ.

ޕީޖީ އޮފީހުން މިއަދު ބުނީ "ބިންވެރިޔާ" އަދި "ގެދޮރުވެރިޔާ" ސްކީމަށް އެދި ފޯމު ބަލައިގަތުމާއި ގޯއްޗާއި ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި ކަނޑައެޅިފައިވާ ގަވާއިދުތަކާއި އުސޫލުތަކާ ޚިލާފަށް ކަންކަން ގެންގޮސްފައިވާތީ ޕީޖީ އައްބާސް ކަންބޮޑުވެވަޑައިގަންނަވާ ކަމަށެވެ.

ޕީޖީ އޮފީހުން ބުނީ އެއީ، އާންމުންގެ މަސްލަހަތު މަތީ މިންވަރަކަށް އެކުލެވޭ ކަމަކަށްވާތީ، އެއީ ޖިނާއީ ތަހުގީގެއް ހިންގަންޖެހޭ ކަމެއް ކަމަށް ޕީޖީއަށް ފެނިވަޑައިގަންނަވާ ކަމެއް ކަމަށެވެ. އެހެންކަމުން ގާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސިކިއުޓާ ޖެނެރަލްއަށް ލިބިދީފައިވާ ބާރުގެ ދަށުން، "ބިންވެރިޔާ" އަދި "ގެދޮރުވެރިޔާ" ސްކީމްގެ ފޯމު ބަލައިގަތުމާއި ފްލެޓާއި ގޯތި ލިބޭ ފަރާތްތައް ކަނޑައެޅުމާއި ގޯއްޗާއި ފްލެޓް ދޫކުރުމުގައި އަމަލުކޮށްފައިވާ ގޮތުގެ ތަހުގީގެއް ހިންގުމަށްފަހު، މިކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނަމަ، އެކަން ތަހުގީގު ކުރުމަށްފަހު ދައުވާކުރުމަށްޓަކައި ޕީޖީ އޮފީހަށް ހުށަހެޅުމަށް، ފުލުހުންނާއި، އެންޓި ކޮރަޕްޝަން ކޮމިޝަނަށް (އޭސީސީ) އަށް ޕީޖީ ވަނީ އަމުރު ކުރައްވާފައެވެ.

ޕީޖީ އޮފީހުން ބުނީ އެ މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފުތާއަކު އެއް ފަހަރު އައްބާސްއާ ހިއްސާ ކުރަމުން ގެންދިއުމަށާއި އެ މައްސަލައިގެ އަވަސް ތަހުގީގެއް ހިންގުމަށްވެސް އައްބާސް އަމުރު ކުރައްވާފައިވާ ކަމަށެވެ.

މި މައްސަލަ ފެންމަތިވުމާއި ގުޅިގެން ފުލުހުންވެސް ވަނީ އިއްޔެ އެޗްޑީސީއަށް ވަދެފައެވެ. އެއީ ތަހުހީގަށް ބޭނުންވާ ތަކެތި ހޯދުމަށެވެ. އަދި މިހާރު ވަނީ އެޗްޑީސީގެ ބޯޑުގެ ޗެއާރމަން ފިޔަވައި ބޯޑުގެ ހުރިހާ މެމްބަރުން ސަސްޕެންޑް ކޮށްފައެވެ.

ހިޔާލުފާޅު ކުރައްވާ!

Leave a Reply

Your email address will not be published. Required fields are marked *