މިދިޔަ ސަރުކާރުން ކުރިޔަށް ގެންދިޔަ "ބިންވެރިޔާ" ސްކީމުގައި ގޯއްޗަށް ނޭދޭ ދެ ފަރާތަކަށް ހުޅުމާލެއިން ގޯތި ދިން މައްސަލައެއް ފެންމަތި ވެފައިވަނިކޮށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އަށް ފުލުހުން ވަދެއްޖެއެވެ.
އެޗްޑީސީގެ ތެރެއިން ހިނގާފައިވާ ކަމަށް ބުނާ މި މައްސަލަ ފެންމަތިވުމާއި ގުޅިގެން ފުލުހުން މިހާރު ދަނީ އެ މައްސަލަ ބަލަމުންކަން ފުލުހުންވެސް ވަނީ ކަށަވަރުކޮށްދީފައެވެ. މައުލޫމާތު ލިބިފައިވާ ގޮތުގައި ފުލުހުން އެޗްޑީސީއަށް ވަނީ ތަހުގީގަށް ބޭނުންވާ ބަޔެއް ތަކެތި ހޯދުމަށެވެ. މި މައްސަލައިގައި ފުލުހުން ހިންގަނީ ޖިނާއީ ތަހުހީގެކެވެ.
އެނގިފައިވާ ގޮތުގައި ބިންވެރިޔާ ސްކީމުން ބޭރުން ދޫކުރި އެ ދެގޯތީގެ ވަށާފާރު ރޭނުމުގެ ހުއްދައަށް އެޗްޑީސީން ވަނީ ހައުސިންގ މިނިސްޓްރީގައި އެދިފައެވެ. އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަަށް އެޑްރެސް ކުރައްވައި، ހައުސިން މިނިސްޓްރީގެ ސްޓޭޓް މިނިސްޓަރު އިބްރާހިމް ނިޒާމު ފޮނުއްވި ސިޓީގައި ވިދާޅުވެފައިވަނީ، އެ ދެ ފަރާތަކީ ބިންވެރިޔާ ސްކީމުން ގޯއްޗަށް އެދި އެޕްލިކޭޝަން ހުށަހަޅާފައިވާ ފަރާތްތަކެއް ނޫންކަން އެ ސްކީމުގެ ޑޭޓާބޭސް އިން ދައްކާ ކަމަށެވެ.
އާންމުވެފައިވާ ލިޔުން ތަކުން ފެންނަ ގޮތުގައި ސްކީމުން ބޭރުން ގޯތި ލިބުނު މީހުންގެ ތެރޭގައި އެޗްޑީސީގެ އެމްޑީ، ފަޒުލް ރަޝީދުގެ ބޭބެ ފަޒީލް ރަޝީދުވެސް ހިމެނެއެވެ. ހައުސިން މިނިސްޓްރީގެ ސިޓީގައިވާ ގޮތުން އޭނާއަކީ ބިންވެރިޔާ ސްކީމްގެ ދަށުން ގޯތި ހޯދަން އެދުނު ފަރާތެއްވެސް ނޫނެވެ.
މި މައްސަލައިގައި އެޗްޑީސީން މިހާތަނަށް އެއްވެސް އެއްޗެއް އަދި ނުބުނެއެވެ.