ކޮވިޑް19 ގެ ދުވަސްވަރު ކުދި ގައުމުތުން ދަރަނި ނަގަން މަޖުބޫރު ވެގެން ދިޔަކަމަށާއި، މިހާރު އެ ގައުމުތަކަށް ކުރިމަތިވެފައިވާ ގޮންޖެހުމަކީ އޭރު ނެގި ދަރަނި ބަހައްޓައިގެން މެނޭޖް ކުރުން ކަމުގައި ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.
އިންޑިއާގައި އޮތް މި އަހަރުގެ ގްލޯބަލް އިކޮނޮމިކް ޕޮލިސީ ފޯރަމުގައި ވާހަކަ ދައްކަވަމުން މިނިސްޓަރު ޒަމީރު ވިދާޅުވީ، މުޅި ދުނިޔެއަށް ކުރިމަތިވި ކޮވިޑް-19 ބަލިމަޑު ކަމުގެ ސަބަބުން ގިނަ ގައުމުތަކުގެ އާންމު ޚިދުމަތްތައް މެދުކެނޑުނަނުދީ ދެމެހެއްޓުމަށްޓަކައި، ސަރުކާރު ތަކުން ކުރާ ޚަރަދު އިތުރު ވެގެންދިޔަ ކަމަށެވެ. އޭގެ ސަބަބުން ޚާއްސަކޮށް ރާއްޖެފަދަ ކުދި ގައުމުތަކުން ދަރަނި ނަގަން މަޖުބޫރުވެގެން ދިޔަކަން މިނިސްޓަރު ފާހަގަ ކުރެއްވިއެވެ.
މިނިސްޓަރު ޒަމީރު އިތުރަށް ވިދާޅުވީ، ރާއްޖެ ފަދަ ކުދި ގައުމުތަކަށް ބައިނަލްއަގްވާމީ މާލީ އެހީތެރިކަން ބޭނުންވާ ކަމަށެވެ.
ޒަމީރު ވިދާޅުވީ ދިވެހިރާއްޖެއިންވެސް އިއާދަކުރަނިވި ހަކަތައިގެ މިންވަރު އިތުރުކޮށް، މޫސުމީ ބަދަލު ތަކުން އަރައިގަނެ، ތަރައްގީ ހޯދުމަށް ކުރަމުންދާ މަސައްކަތްތަކުގައި ކަނޑައަޅާފައިވާ އަމާޒަށް ވާސިލުވާން ބޭނުން ކަމަށެވެ. އެކަމަށް ބޭރު ގައުމުތަކުގެ އެހީތެރިކަން ބޭނުންވާކަން ޒަމީރު ފާހަގަ ކުރެއްވިއެވެ. ރާއްޖޭގައި ބޭނުންކުރާ ހަކަތައިގެ 33 އިންސައްތައަކީ އިއާދަކުރަނިވި ހަކަތައަށް ބަދަލު ކުރަން އަމާޒު ހިފާފައިވާ ކަންވެސް މިނިސްޓަރު ފާހަގަ ކުރެއްވިއެވެ.
އިންޑިޔާގެ ވެރިރަށް ނިއު ދިއްލީގައި ކުރިޔަށްދިޔަ ގްލޯބަލް އިކޮނޮމިކް ޕޮލިސީ ފޯރަމްއަކީ، ކޮންފެޑެރޭޝަން އޮފް އިންޑިއަން އިންޑަސްޓްރީ (ސީއައިއައި) އިން އިންތިޒާމު ކޮށްގެން ބޭއްވި ފޯރަމެކެވެ.
