އަންނަ ރޯދަ މަހަށް 50 ޓަނު ކަދުރު ސައުދީއަރަބިއްޔާއިން ރާއްޖެއަށް ހަދިޔާ ކޮށްފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓަރ ޑރ. މުޙަންމަދު ޝަހީމް އަލީ ސައީދު ވިދާޅުވީ، ސައުދީ ސަރުކާރުން ދިވެހިންނަށް ހަދިޔާ ކުރި 50 ޓަނުގެ ކަދުރު ޝިޕްމަންޓް މިހާރު ލިބިފައިވާ ކަމަށެވެ.
މިނިސްޓަރ ޝަހީމް ވިދާޅުވީ، ކުރިއަށް އޮތް ރޯދައިގެ ކުރިން ރާއްޖޭގެ ހުރިހާ ހިސާބަކަށްވެސް ކަދުރު ބަހައި ނިންމާނެ ކަމަށެވެ. އަދި މިސްކިތްތަކުގައި ރޯދަ ވީއްލުން އިންތިޒާމު ކުރަމުން އަންނަ ޖަމްއިއްޔާތަކަށްވެސް މި ކަދުރުން ބަޔެއް ދޫކުރާނެ ކަމަށް ޝަހީމް ވިދާޅުވިއެވެ.
ސައުދީއަރަބިއްޔާއިން އަންނަނީ ކޮންމެ އަހަރަކުވެސް ރޯދައަށް ރާއްޖެއަށް ކަދުރު ހަދިޔާ ކުރަމުންނެވެ. މިދިޔަ ދެ އަހަރުވެސް ސައުދީ ސަރުކާރުން ރާއްޖެއަށް 50 ޓަނު ކަދުރު ހަދިޔާ ކޮށްފައިވެއެވެ.
