އއ.އަތޮޅު މާޅޮހު ކައުންސިލް ތިޖޫރީން ހަތަރު ލައްކައަށްވުރެ ގިނަ ރުފިޔާ، ގެއްލިފައިވާކަމަށް އޮޑިޓް ރިޕޯޓުން ދައްކައިފި އެވެ.
މާޅޮހު ކައުންސިލް އިދާރާގެ ހާއްސަ އޮޑިޓް ރިޕޯޓްގައިވާ ގޮތުން، ކައުންސިލް އިދާރާގެ ތިޖޫރީން 2017 އަދި 2028 ވަނަ އަހަރު ނަގާފައިވާ ފައިސާގެ ތެރެއިން ޖުމްލަ 492،867 ރުފިޔާ ވަނީ ގެއްލިފަ އެވެ.
އެ ފައިސާގެ ތެރޭގައި ބޭންކް އެކައުންޓުން ނެގި ފައިސާގެ ތެރެއިން ކައުންސިލް އިދާރާގެ ތިޖޫރީއަށް ވައްދާފައިނުވާ 255،584 ރުފިޔާ އާއި ކައުންސިލް އިދާރާގެ އެކިއެކި ކަންކަން ކުރުމަށް ލިޔެކިޔުންތައް އޮޅުވާލައިގެން ކައުންސިލް އިދާރާގެ ބޭންކު އެކައުންޓުން ނަގާފައިވާ 112،500 ރުފިޔާ ހިމެނެއެވެ. މީގެ އިތުރުން މުއައްޒަފުންނަށް މުސާރަ އާއި އެލަވަންސްގެ ގޮތުގައި ދޭންޖެހޭ ވަރަށްވުރެ އިތުރަށް ތިޖޫރީ އާއި ބޭންކު އެކައުންޓުންނެގި 82،579 ރުފިޔާއެވެ. މީގެ އިތުރުން ކައުންސިލް އިދާރާގެ އެކައުންޓަށް ޖަމާކުރުމަށް ތިޖޫރީން ނެގި 42،204 ރުފިޔާވެސް ހިމެނެއެވެ.
އޮޑިޓް ރިޕޯޓްގައިވާ ގޮތުން ކައުންސިލް އިދާރާގެ ފައިސާގެ ކަންކަމާ 2018 ވަނަ އަހަރު ހަވާލުވެ ހުރި ކައުންސިލް އިދާރާގެ ކުރީގެ އެޑްމިން އޮފިސަރު އެ އަހަރު ކައުންސިލް އިދާރާއަށް ލިބިފައިވާ ފައިސާގެ ތެރެއިން ގާތްގަނޑަކަށް ދެ ލައްކައެއްހާ ރުފިޔާ އަމިއްލަ ބޭނުންތަކަށް ބޭނުންކުރިކަމަށް އިއުތިރާފްވެފައިވެ އެވެ.
