ހިޔާ މަޝްރޫއުގެ ދަށުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހުޅުމާލެ ފޭސް ދޭއްގައި އިމާރާތްކޮށްފައިވާ ތިން ޓަވަރު އިމާރާތް ކުރުމުގައި ކޮރަޕްޝަން ހިންގާފައިވާ ކަމަށް ކުރެވޭ ތުހުމަތުތަކާ ގުޅިގެން އެ ކުންފުނީގެ އޭރުގެ މެނެޖިން ޑީރެކްޓަރާއި ފައިނޭންޝަލް ކޮންޓްރޯލާ ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރު ކުރަން ނިންމައިފިއެވެ.

އެބޭފުޅުން ކޮމިޓީއަށް ހާޒިރުު ކުރަން ފާސްކުރީ، އެމްޕީއެލްގެ ހިޔާ މަޝްރޫއުގެ ހާއްސަ އޮޑިޓް ރިޕޯޓަށް، ކޮމިޓީން މިއަދު ކުރިއަށްގެްނދިޔަ މަޝްވަރާ ތަކަށްފަހުގައެވެ.

އެ އޮޑިޓް ރިޕޯޓަށް ވާހަކަ ދައްކަވަމުން މަޖިލީހުގެ ނާއިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވީ، އެ ޕްރޮޖެކްޓްގެ އޮޑީތް ރިޕޯޓުން މުޅިންވެސް ފެންނަނީ އިހުމާލާ ހިޔާނާތް ކަމަށެވެ.

އޮޑިޓް ރިޕޯޓުގައި ވާގޮތުން އެ މަޝްރޫއަށް ޕްރޮޕޯސަލް ހުށަހަޅަން 6 ދުވަހުގެ މުއްދަތެއް، ދީފައިވާއިރު، ބިޑިން މަރުހަލާގެ ތެރެއިން ބިޑު ސެކިއުރިޓީއެއް ނުނަގާ އަދި ޕާފޯމަންސް ސެކިއުރިޓީގެ ގޮތުގައި ބެހެއްޓީ 10 ޕަސެންޓުގެ ބަދަލުގައި 2.2 ޕަސެންޓެވެ. ކޮންޓްރެކްޓަރުގެ ބީއޯކިޔު ހުށަހެޅީ ގިނަ ފްލޯތަކުގައި ކުލަ ލުމުގެ އަގު ނުހިމަނާ، ވޭރިއޭޝަނާއެކު ކުލަ ލާން ކުރި ހަރަދު އެހެން މަޝްރޫއުތަކަށް ވުރެ ބޮޑެވެ.

ސައިޓު ހަވާލުކުރާތާ ދެ އަހަރުގެ ތެރޭގައި މަސައްކަތް ނިންމާ ގޮތަށް އެއްބަސްވީ ނަމަވެސް، މަޝްރޫއު ނިމުނީ ފަސް އަހަރާ ތިން މަހުންނެވެ.

މަޝްރޫއަށް ކޮންސަލްޓަންޓަކު ނެގީ އަމަލީ މަސައްކަތް ފެށިތާ ހަ މަސް ދުވަސް ފަހު ކަމަށާއި، އޮޑިޓުން ކުންފުނިން ކުރި އިންވެސްޓްމަންޓު، ހުރިހާ ފްލެޓުތަކަށް ފައިސާ ދައްކާ ނިމޭއިރު ވެސް އަނބުރާ ނުލިބޭނެ ކަމަށް އޮޑީތް ރިޕޯޓްގައި ވަނީ ފާހަގަ ކޮށްފައެވެ.

ކުންފުނީގެ ކޭޝްފްލޯއިން އެކަމަށް ހަރަދު ކުރަން ޖެހުމުން ކުންފުނީގެ އެހެން ކަންކަަށް ހުރި ފައިސާ މަދުވެ، ލިބޭ ފައިދާއިން ސަރުކާރަށް ދައްކަން ޖެހޭ ޑިވިޑެންޑު ވެސް ނުދައްކާ ކަމަށް ވެސް ވަނީ ފާހަގަ ކޮށްފައެވެ. އެގޮތުން 2018 އިން 2022 އަށް އެ ކުންފުނިން ޑިވިޑެންޑުގެ ގޮތުގައި ދައްކަން ޖެހޭ 346 މިލިއަން ރުފިޔާގެ ތެރެއިން 291 މިލިއަން ރުފިޔާ އެ ކުންފުނިން އޮތީ ނުދައްކައެވެ.

މި މައްސަލަަތަކާ ގުޅިގެން އެމްޕީއެލްގެ ކުރީގެ އެމްޑީ އާއި ފައިނޭޝަލް ކޮންޓްރޯލާ ކޮމިޓީއަށް ހާޒިރުކުރަން ހުށަހެޅުއްވީ، ހަނިމާދޫ ދާއިރާގެ މެންބަރު އަބްދުލް ގަފޫރު މޫސާއެވެ. ތާއީދު ކުރެއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ އެވެ.