ރައްޔިތުންގެ މަޖިލީހުގެ މިއަދު ޖަލްސާ ކެންސަލް ކުރަން ޖެހުނީ މަޖިލީހުގައި ކުރާނެ މަސައްކަތެއް މިވަގުތު ނެތުމުން ކަމަށް މައުލޫމާތު ލިބިއްޖެއެވެ.
މިއަދު ހެނދުނު 9 ޖަހާއިރު ބާއްވަން އޮތް ޖަލްސާގެ އެޖެންޑާ މިއަދު ހެނދުނާ ހަމައަށް އައިއިރުވެސް އާންމު ނުކުރެއެވެ. އެޖެންޑާ ނުލީވެސް މިއަދު ކުރާނެ މަސައްކަތެއް ނެތުމުން ކަމަށް މައުލޫމާތު ލިބިފައިވެއެވެ.
ނަމަވެސް މިއަދު ޖަލްސާ އޮންނާނެ ކަމަށް އިއްޔެ އޮތް ޖަލްސާ ނިންމާލައްވަމުން މަޖިލީހުގެ ރައީސް ވިދާޅުވިއެވެ. މަޖިލީހުގައި ކުރަން މަސައްކަތް ތަކެއް ހުރުމުން މަޖިލީހުގެ ދައުރުވެސް މިމަހުގެ 15 ވަނަ ދުވަހުގެ ނިޔަލަށް މީގެކުރިން ވަނީ ދަންމާލާފައެވެ.
ނަމަވެސް، ބަޔެއް މީޑިޔާ ތަކުގައި ރިޕޯޓު ކޮށްފައިވާ ގޮތުގައި މަޖިލީހުގެ އިދާރާއިން ބުނެފައި ވަނީ ދެން ޖަލްސާއެއް އެންމެ އަވަހަށްވެސް އޮންނާނީ އަންނަ ހޯމަ ދުވަހު ހެނދުނު ކަމަށެވެ.
