ޕީޕީއެމްގައި މިހާރު ތިބި ހުރިހާ މެމްބަރުން މިއަދުން ފެށިގެން، ޕީއެންސީއަށް ބަދަލުވުމަށް ރަސްމީކޮށް އެދިވަޑައިގަންނަވާ ކަމުގައި ޕީޕީއެމްގެ ނައިބު ރައީސް ޣައްސާން މައުމޫން ވިދާޅުވެއްޖެއެވެ.
ޣައްސާން މިފަދައިން ވިދާޅުވީ، ޕީޕީއެމް އުވާލަން އެ ޕާޓީގެ ސެނެޓުން މިއަދު ނިންމުމާއި ގުޅިގެންނެވެ. 42 ސެނެޓަރުންގެ ވޯޓުން ޕީޕީއެމް އުވާލަން ފާސް ކުރުމަށްފަހު ޣައްސާން ވިދާޅުވީ، ޕީޕީއެމް އުވާލަން ނިންމި ދުވަހަކީ އުފާވެރި ދުވަހެއް ކަމަށެވެ.
މިއަދު އޮތް ބައްދަލުވުމުގައި ބަޔެއް ސެނެޓަރުން ވަނީ ކަންބޮޑުވުންވެސް ފާޅު ކޮށްފައެވެ. އެއީ ދާދިފަހުން ގާނޫނުއަސާސީއަށް ގެނައި އިސްލާޙުގެ ސަބަބުން ޕާޓީ ބަދަލުކުރާ މެމްބަރުންގެ ގޮނޑި ގެއްލިދާނެތޯ އޮތް ކަންބޮޑުވުމެވެ. އެކަމަށް ޕީޕީއެމްގެ ލީޑަރޝިޕުން ދީފައިވާ ޖަވާބަކީ މި ޙާލަތަކީ އާ ހާލަތެއް ކަމަށާއި، އެކަން އޮންނަ ގޮތް ސާފު ކުރާނެ ކަމަށެވެ.
އުވާލަން މިއަދު ނިންމި ޕީޕީއެމްއަކީ ރާއްޖޭގައި އޮތް އެންމެ ބޮޑު އެއް ޕާޓީއެވެ. އަދި ރާއްޖޭގެ ވެރިކަންވެސް ކޮށްފައިވާ ބޮޑު ޕާޓީއެކެވެ.
