ރާއްޖޭގައި އޮތް އެންމެ ބޮޑު އެއްޕާޓީ ކަމަށްވާ ޕީޕީއެމް އުވާލަން އެ ޕާޓީގެ ސެނެޓުން މިއަދު ނިންމައިފިއެވެ.
2013 ން 2018 އަށް ރާއްޖޭގެ ވެރިކަންވެސް ކުރި ޕީޕީއެމް އުވާލަން އެ ޕާޓީން ނިންމީ މިއަދު ބޭއްވި ސެނެޓުގެ ބައްދަލުވުމެއްގައެވެ. ޕާޓީ އުވާލަން ސެނެޓުގެ 42 ސެނެޓަރުން ވަނީ ވޯޓު ދީފައެވެ.
ޕީޕީއެމް އެންމެ ފުރަތަމަ އުފެއްދީ ކުރީގެ ރައީސް މައުމޫނު އިސްވެ ހުންނަވައެވެ. އެއީ އޭރު ރައީސް މައުމޫން އުފައްދަވާފައިވާ ޑީއާރުޕީގެ އެތެރޭގައި ހިނގައިދިޔަ މައްސަލައެއްގައި ރައީސް މައުމޫން ޑީއާރުޕީއާ ދުރުވެވަޑައިގެން އުފެއްދެވި ޕާޓީއެކެވެ. ނަމަވެސް ފަހުން ރައީސް މައުމޫންވެސް ވަނީ ޕީޕީއެމް ދޫކުރައްވައި އެހެން އެމްއާރުއެމް އުފައްދަވާފައެވެ.
ރައީސް މައުމޫނުގެ ވެރިކަމަށް ފަހު ޕީޕީއެމް ދެން ލީޑު ކުރެއްވީ އޭރުގެ ރައީސް، އަބްދުﷲ ޔާމީންއެވެ. ދާދިފަހަކާ ޖެހެންދެކަށްވެސް ޕީޕީއެމް ލީޑު ކުރެއްވީ ރައީސް ޔާމީނެވެ. ނަމަވެސް ނިމިދިޔަ ރިޔާސީ އިންތިޚާބުގައި ޕީޕީއެމް، ޕީއެންސީގެ ކޯލިޝަނުން ރައީސް ޑރ. މުޙަންމަދު މުއިއްޒު ވެރިކަމަށް ވަޑައިގެން ޕީޕީއެމްގެ ބަދަލުގައި ޕީއެންސީ ވަރުގަދަ ކުރައްވަމުން ގެންދެވިއެވެ. އެއާއެކު ޕީޕީއެމް އުވިދާނެ ކަމުގެ ނުވަތަ އުވާލުމުގެ ވާހަކަ ތަކެއް އަބަދުވެސް ދިޔައީ ދެކެވެމުންނެވެ.
