ސަރުކާރުން ރިޓަޔާވާ މީހުންނަށް މަހުން މަހުން ދެމުން އައި ޕެންޝަން ފައިސާ އަންނަ މަހުން ފެށިގެން ހުއްޓާލަން ސަރުކާރުން ނިންމި ނިންމުން އަނބުރާ ގެންދަން ސަރުކާރުން ނިންމައިފިއެވެ.
ފިނޭންސް މިނިސްޓްރީން ސަރުކާރުގެ އިދާރާތަކަށް އެކަން އެންގުމަށްފަހު، އެކަން އަނބުރާ ގެންގޮސް އެ އެންގުން އުވާލައިފި ކަމަށް ފިނޭންސް މިނިސްޓަރ މޫސާ ޒަމީރު ވަނީ ވިދާޅުވެފައެވެ.
މިނިސްޓަރު ޒަމީރު ވިދާޅުވީ، މުވައްޒަފުންނަށް ޑަބަލް ޕެންޝަންގެ ގޮތުގައި މަހުން މަހަށް ލިބޭ އަދަދަށް ބަދަލެއް ނުގެނެސް އެގޮތަށް ކުރިއަށް ގެންދަން ނިންމާފައިވާ ކަމަށެވެ. ސަބަބަކީ އެ އިނާޔަތް ލިބޭ މީހުންގެ ކަންބޮޑުވުންތައްް ހުރުމުން ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ޕެންޝަން އިނާޔަތް ވަރަށް ކުރީއްސުރެވެސް ލިބެމުން އަންނަ ފަރާތްތައް އެބަތިބި ކަމަށާއި، އެހާގިނަ ދުވަހު ލިބެމުން އައި އިނާޔަތެއް ހުއްޓާލުމުން އެފަރާތް ތަކަށް އުނދަގޫތައް ކުރިމަތިވާނެ ކަމަށެވެ.
ރައީސް އޮފީހުންވެސް ބުނީ ކުރިން ނިންމި ނިންމުން އަނބުރާ ގެންގޮސް ބަދަލު ކުރީ މުވައްޒަފުންގެ ކަންބޮޑުވުންތައް ހުރުމުން ކަމަށެވެ.
