އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ ހިންގުން ވަގުތީ ގޮތުން ހަޔާ އެޑިއުކޭޝަން، ލޭބާ އެންޑް ސްކިލްސް ޑިވޮމޮޕްމެންޓް މިނިސްޓަރު ޑރ މަރިޔަމް މާރިޔާއާ ރައީސް ޑރ މުހައްމަދު މުއިއްޒު ހަވާލުކުރައްވައިފި އެވެ.
ބަލިހާލަތު ހުރި ގޮތުން މަސްއޫލިއްޔަތު އަދާކުރަން ތަން ނުދޭތީ އެގްރިކަލްޗާ މިނިސްޓަރު ޑރ. އައިޝަތު ރަމީލާ ވަނީ މިއަދު މަގާމުން އިސްތިއުފާ ދެއްވައިފަ އެވެ.
ރައީސް އޮފީހުން މިއަދު ބުނީ، މިނިސްޓަރު ކަމުން ރަމީލާ އިސްތިއުފާ ދެއްވީ ސިއްހީ ހާލަތު ސަބަބުތަކަކާ ހެދި ކަމަށެވެ. ރަމީލާ ގެންދަވަނީ ކެންސަރުގެ އާލާސްކަންފުޅަކަށް ފަރުވާ ހޯއްދަވަމުންނެވެ. ރަމީލާގެ އިސްތިއުފާ ރައީސް ޑރ. މުޙަންމަދު މުއިއްޒު ވަނީ ގަބޫލުފުޅުވެސް ކުރައްވާފައި ކަމަށް ރައީސް އޮފީހުން ބުންޏެވެ.
ކެންސަރުގެ ބައްޔަށް ފަރުވާ ހޯއްދަވަމުން ގެންދަވާކަން ރަމީލާ އާންމުކޮށް ވިދާޅުވީ، ވަޒީރުކަމުގެ ވަރަށް ކުރީކޮޅުގައެވެ. އޭގެފަހުން، ކެންސަރަށް އިންޑިޔާގައި ފަރުވާ ހޯއްދަވަމުން ގެންދިއުމަށްފަހު، މިދިޔަ ފެބްރުއަރީ މަހު އޮފީހަށް ނުކުންނަވަން ފެއްޓެވިއެވެ.
ވަޒީރު ކަމުން އިސްތިއުފާ ދެއްވި ރަމީލާ މީގެކުރިން ވަނީ ހެލްތް މިނިސްޓްރީގެ ސްޓޭޓް މިނިސްޓަރުކަންވެސް ދެފަހަރެއްގެ މަތިން ކުރައްވާފައެވެ. އަދި 2010 ވަނަ އަހަރު ސޯޝަލް ސައިންސްގެ ދާއިރާއިން މެލޭޝިޔާގެ ޔުނިވާރސިޓީއަކުން ޕީއެޗްޑީ ހެއްދެވިއެވެ. ރަމީލާއަކީ އެންމެ ފުރަތަމަ ނަރުހެކެވެ.
